И богатите плачат: Како славните жени го поднесоа разводот?

Дру Баримор (43)

При гостувањето во емисијата „Sunday TODAY with Willie Geist“ годинава, глумицата Дру Баримор откри како пронашла зрак светлина во темните мигови:

„Не барав работа. Престанав да глумам, затоа што сакав да ги израснам децата. Кога се разделив од нивниот татко, сѐ ми се промени во животот. Беше навистина тешко. Станав мрачна и преплашена. Откако добив сценарио за филм, прво што си помислив беше: „Мислам дека ова не е вистинското време.“ Звучи иронично, но сметам дека ме научи вредна животна лекција. Понекогаш, иако мислите дека нешто дошло во најлошо време, или, пак, дека е најлоша идеја, тоа всушност може да ве спаси и извлече од бездната. Ви дава нов фокус и охрабрување, оттргнувајќи ви ги мислите и грижите.“

Ким Бесинџер (64)

Зборувајќи за нејзиниот развод од Алек Болдвин, како и заедничката ќерка, актерката Ким Бесинџер даде и родителски совети за магазинот The Edit во 2016 година:

„Каков и да е, разводот секогаш тешко ќе му падне на детето. А, нашиот беше јавен и мачен. Затоа и ќерката ја одгледував на мошне неконвенционален начин. Сѐ што сакав е таа да биде слободна. Ако желба ѝ беше да ги викне другарчињата на гости, или, пак, да пишува по ѕидовите, тоа ми беше сосема во ред. Сакав нејзиното детство да биде полно со љубов, светлина, животни и пријатели.“

Ева Лонгорија (43)

После разводот од кошаркарот Тони Паркер, латино убавицата Ева Лонгорија паднала во тешка депресија. Таа ја отвори душата во емисијата на Доктор Оз од 2013 година:

„Ми се чини дека тогаш добив најмногу комплименти, затоа што бев преслаба. Не јадев. Бев депресивна. Бев тажна. Само кафе пиев. Луѓето постојано ми велеа: „Изгледаш фантастично! Разводот добро ти стои.“. А, јас во себе си мислев: „Не се чувствувам добро. Немам енергија.“”

Памела Андерсон (50)

Во интервјуто за списанието W од 2016 година, Памела Андерсон беше сурово искрена за разделбата од Рик Саломон, но и сопствениот изглед дури беа заедно:

„Додека бев во таа ужасна врска, изгледав дваесет години постара. Знам дека звучи како клише, ама среќата навистина е поврзана со убавината. Мирот, спокојството и избегнувањето на стресот се мошне важни за да се чувствувате убаво и самоуверено. Сеедно е дали носите шминка, или, пак, не. Се сеќавам дека за време на едно снимање се погледнав во огледалото, па си помислив: „Која е оваа особа? Како си дозволив себеси вака да завршам?““

Мараја Кери (48)

Ниту поп дивата не се прослави во брачнитe води. По разводот од Томи Мотола, истото ѝ се повтори и со раперот Ник Канон, иако станаа родители на близнаци. Мараја Кери не ја криеше разочараноста во разговорот за магазинот Complex во 2016 година:

„Никогаш не помислував дека ќе имам деца со некој од кого подоцна ќе се разведам. Но, тоа е животот. Така требало да биде. Заради моите деца, посакувам да не се завршеше на овој начин. Меѓутоа, сега веќе е готово.“

М. А. | Црнобело