„Првпат бакнав девојка на 20 години“: Елиот Пејџ се отвори за периодот пред да сфати дека е трансродово лице

Детали

среда, 31 мај 2023

„Ја бакнав, во бар за хомосексуалци. Почнав да разбирам за што ги пишуваат поемите. Секоја жена што ја сакав не ме сакала. Но, бев овде, со жена која сакаше да ме бакне“, пишува Елиот Пејџ во неговите мемоари во кои зборува за својата транзиција, проблемите со менталното здравје и љубовниот живот, пред и откако сподели дека е трансродов маж.

Откако изјави дека е трансродов маж и го промени името од Елен во Елиот Пејџ, познатиот актер отворено зборува за неговото искуство како дел од ЛГБТ заедницата.

Сега, 36-годишниот актер напиша и мемоари во кои зборува за својата транзиција, менталното здравје, врските, сексуалниот живот и, генерално, неговото искуство во Холивуд.

Книгата, насловена Pageboy, ќе биде издадена на почетокот од јуни, но магазинот People веќе сподели некои ексклузивни детали.

Во првото поглавје, Елиот зборува за неговото прво излегување во бар за хомосексуалци, но и бакнежот со девојка кој променил сè.

Претходно Елиот изјави дека се чувствувал како момче уште од 9-годишна возраст, но поради стигмата поврзана со трансродовите лица, му требале многу години за да собере храброст и да го покаже своето вистинско лице.

Во книгата, актерот открива дека првпат отишол во бар за хомосексуалци во 2008 година, кратко пред премиерата на Juno – филмот што го направи светски познат.

Тогаш актерот имал 20 години и овде сретнал девојка – Пола.

Елиот истакнува дека извесен период само гледале еден во друг и, на крај, тој ја прашал дали може да ја бакне. Ова бил неговиот прв бакнеж со девојка.

„И, ја бакнав. Во бар за хомосексуалци. Пред сите луѓе околу нас. Почнував да разбирам за што ги пишуваат поемите. Претходно сè беше студено, неподвижно, без емоции.

Секоја жена што ја сакав не ме сакала и, онаа која можеби ме сакаше, ме сакаше на погрешен начин. Но, бев овде, на подиумот, со жена која сакаше да ме бакне“, пишува актерот.

Ова излегување му помогнало на актерот да почне да се прифаќа себеси.

Поради стигмата за трансродовите лица, Елиот чувствувал срам од кој не можел да се ослободи.

„Но, имаше радост во таа просторија, ме возвиши, ми предизвика неконтролирана насмевка“, пишува тој.

Пред да го промени родот, во 2014-та, Елиот (тогаш Елен) изјави дека е хомосексуалец.

Потоа, две години беше во брак со танчарка од Канада, но се разведоа во 2021 година.

Последно, Елиот беше во врска комичарката Мае Мартин, но не е познато дали уште се заедно.

Во врска со мемоарите, актерот изјави дека никогаш не мислел дека ќе успее да ги заврши. Сепак, сметал дека сега е вистинското време да ја сподели својата приказна со светот.

„Книгите, особено мемоарите, навистина ми го променија животот, ми понудија инспирација, утеха, сите тие работи.

Овој период не само на омраза, туку и дезинформации и лаги за животот на ЛГБТ луѓето, ми се чинеше како вистинско време да ја издадам книгата“.

Актерот истакнува дека и за разлика од другите трансродови лица, тој дефинитивно е привилегиран.

„Моето искуство како трансродова личност и овој живот што го имам, привилегијата, не ја претставува реалноста на повеќето трансродови лица…

Реалноста е дека трансродовите лица се борат со невработеност, често се бездомници. Трансродовите жени со темна кожа се убивани. Луѓето го губат правото на медицинска нега или немаат пристап до неа“.

На крај, актерот вели дека и покрај привилегијата, сепак и тој се соочил со многу тешки мигови, за кои ќе дознаеме повеќе во книгата.

„Некогаш се чувствувам како едвај да стигнав до овде. Но, сега сум благодарен што сум тука и што сум жив“.

Спирова С. | Црнобело