Меган Маркл во раскошен аутфит од 12.000 долари на гала во Њујорк, со принцот Хари и мајка ѝ

Детали

среда, 17 мај 2023

Откако го пропушти крунисувањето на кралот Чарлс, Меган Маркл доби награда за нејзиното залагање за женските права, а на свеченоста се појави во златен аутфит кој чини 12.000 долари. На настанот присуствуваа принцот Хари и нејзината мајка Дорија кои се нејзина најголема поддршка по скандалите.

Меган Маркл не присуствуваше на крунисувањето на кралот Чарлс, но очигледно не ѝ недостасува гламурот на кралското семејство.

41-годишната сопруга на принцот Хари, вчера (16.05) присуствуваше на гала свеченост, каде што доби и награда.

Меган ја доби наградата Woman of Vision (жена со визија) за нејзиното залагање за правата на жените.

Таа се појави во златен раскошен аутфит кој, според Daily Mail, чини 12.000 долари.

Бидејќи станува збор за феминистички настан, Меган одбрала креација од брендот Johanna Ortiz чиј сопственик е жена.

Златниот фустан е со миди здолниште и има шлиц на предниот дел, како и мал исечок под градите. Фустанот чини 1.850 долари.

Меган ја дополнила комбинацијата со златни сандали од брендот Tom Ford кои чинат 1.350 долари и мала златна чанта од брендот Carоlina Herrera која чини 1.100 долари.

Најскапиот детаљ во нејзиниот аутфит е златната Cartier белегзија која чини дури 7.350 долари.

Според официјалниот веб-сајт на настанот, Меган е „феминистка, шампион за човековите права и родовата еднаквост, како и светски идол“, па затоа ја заслужува наградата.

На веб-сајтот е истакнато и дека Меган е една од најмоќните и највлијателните жени во светот која се нашла на листите на реномираните магазини како Time и британскиот Vogue.

На настанот присуствуваше и принцот Хари кој се појави со темносин костум (кој веќе е препознатлив за него) и бела кошула.

Тука беше и мајката на Меган – Дорија – која наводно живее со парот во Калифорнија.

Дорија носеше едноставен црн фустан со долги проѕирни ракави, во комбинација со црни штикли.

Овој настан се одржува со цел да ја зголеми свесноста за феминистичкото движење и да им оддаде почит на оние кои се залагаат за тоа.

Билетите за галата чинат околу 1.500 долари, додека за една маса присутните одвојуваат по речиси 15.000 долари кои се регистрираат како донација.

По наградата што ја доби, Меган се соочи со критики, особено на Твитер, каде што многумина сметаат дека со високата донација, таа всушност си ја купила „лажната“ награда.

Повеќе фотки од настанот:

• 
• 
• 
• 
• 
• 
• 
• 
• 
•  

Спирова С. | Црнобело