Дац и Александар направија женска верзија на „Уште ми фалиш“ - 32 дами во спотот што ќе ве разнежни (видео)

Во прекрасна атмосфера, исполнета со многу емоции и музика, Дац и Александар вечерва (13.11) го промовираа спотот за женската верзија на песната „Уште ми фалиш“.

Пет години откако една од најпопуларните песни на дуото Дац и Александар, „Уште ми фалиш“, за првпат се слушна во етерот - сега доби нова, женска верзија.  

Ова е првпат во Македонија некоја песна да биде преработена на овој начин и да добие римејк на спот.

Спотот за песната беше промовиран во кафулето „Трибека“, а меѓу бројните гости беа и мажите кои учествуваа во снимањето на оригиналниот спот, како и голем број од жените кои се најдоа во новата верзија.

А тука, во женскиот спот на римејкот на Дац и Александар, се појавија дури 32 дами, меѓу кои и Виолета Томовска, Росана Сариќ Тодоровска, Вера Мештеровиќ, Лејла Сабит, Дани Димитровска, Рисима Рисимкин, Индира Кастратовиќ и други, меѓу кои и Маја Гроздановска Панчева која беше придружен вокал, но и Билјана Ѓошева и Билјана Драгичевиќ Пројковска, кои се воедно и главни вокали во песната.

Меѓу дамите во спотот беше и Вера Јанковиќ, која, беше придружен вокал, а воедно, вечерва беше и водител на промоцијата на видеото.

Таа ги повика Дац и Александар да кажат по неколку збора, па Дац раскажа кратка анегдота од снимањето:

„Кога со мажите го снимавме спотот на оригиналната верзија, не им беше јасен концептот, но испадна добро.

Со жените беше полесно зашто имаше подготвен терен, за 3 и пол часа телефонски ги договорив сите и снимивме во еден ден.

И рековме дека нема време за шминка и фризура, па сите дојдоа спремни од дома, инаку уште ќе снимавме.

Е сега, знаете како е со жени - мене да ме снимаат од лева страна, а колку време ќе ме има, а некои може и ќе се налутат што не се дел од него.

А за снимањето на спотот, му реков на Александар на шега: Што мислиш на крај да се појавиме во 'миничи', ха, ха“ - заврши Дац.

Погледнете го видеото што ќе ве разнежни, a кое Дац и Александар го објавија со пораката „13 ноември 2024 е денот кога жените го ослободија Скопје со љубов“:

А. Ј. | Црнобело