3 предлог книги, поразлични од сè што досега сте прочитале

Немате идеја што да прочитате, а сте во потрага по нешто доволно интересно и квалитетно кое ќе ви го задоволи окото, непцето, умот и душата?

Имаме три предлози за вас. Жанровски сосема различни, една автобиографија, уште една помешана со елементи на патепис и најубавата поезија на светот… без да се измачувате што да прочитате, одвојте време за сите три книги:

Јас сум гениј – Салвадор Дали

Во оваа ретка и мошне значајна автобиографија полека се крева превезот зад кој се крие еден од најгенијалните уметници на 20 век.

Салвадор Дали ги опишува своите животни и уметнички постапки, обидувајќи се да пронајде начин да ја изнесе својата ексцентричност на виделина.

Раѓањето, детството, младоста, каменото доба, тајниот живот на Дали, средбата со Гала и враќањето во Париз се само неколку од деловите во кои ќе уживате во оваа неверојатна книга.

Турнеја на готвачот: Во потрага по совршеното јадење – Ентони Бордејн

Готвењето и патувањето беа најголемата страст во животот на Бордејн. Поттикнат од прашањето – Кое е совршеното јадење, славниот готвач тргнува во потрага по кулинарскиот „свет грал“.

Турнејата на готвачот е хроника на голем број непредвидливи авантури, зачинета со хуморот и харизмата на Бордејн, кој уште еднаш потврдува дека најдобрите јадења не значи дека се кријат во најскапите ресторани низ светот.

Два света – Руми (превод на Тихомир Јанчовски)

Конечно пред нас го имаме најобемното и најамбициозното издание на македонски со поезијата на Џелалудин Руми, персиски филозоф и поет.

Руми вешто ги допира сите аспекти на човековиот живот на земјата–раѓање, љубов, паѓање, смрт… Речиси и да не постои тема која му е туѓа и за која не пишувал. Доколку треба да се опише со еден збор би рекле дека неговата тема е – животот.

„Внатре во оваа непозната љубов, умри. Твојот пат почнува на другата страна. Стани небо“.

Неговата поезија е мелем за душата, а оваа книга е вистински лек за неа.

(О)Милена | Црнобело