Помалку познати бисери на руската книжевност кои не треба да ги пропуштите

Руската литература се одликува со одредена специфичност. Начинот на кој тече нарацијата, имињата и ликовите кои длабоко се врежуваат во меморијата, екстериерот на поднебјето.

Некои од најгенијалните култни дела ѝ припаѓаат токму на руската книжевност. Доколку не сте ги прочитале, време е да одвоите време за:

Херој на нашето време – Михаил Лермонтов

Пет поврзани приказни ја обликуваат оваа неверојатна книга која е испреплетена со романтични моменти, но и бруталност.

Печорин е антихеројот, млад, проколнат и мошне разочаран благородник, а дејството е сместено во дивината на Кавказ, во еден вид егзотична земја населена со интересни и огромни противречности.

Егоистичниот ум на Печорин, неговата свесност за сопственото постоење и која е поентата да се живее, доколку само им се причинува болка на сите останати околу него...

Момче – Фјодор М. Достоевски

Достоевски е еден од ретките автори кои знаат како да ја разголат човековата душа и да остане соголена пред неговите читатели. Тој едноставно го разбира начинот на кој функционира човечкиот ум. Напишана малку поедноставно за разлика од другите негови дела, како „Идиот“, „Злосторство и казна“ и „Браќата Карамазови“, сепак приказната на тинејџерот Аркадиј ќе ве освои.

Идејата која се зачнува на брзи импулси вообичаено трае кратко за реализација. Фамилијарна мелодрама, наивен адолесцентен период и комплицираната врска помеѓу таткото и синот се во фокусот на оваа куса новела.

Доживувањата на еден мртовец – Михаил Булгаков

Напишани во типичен булгаковски стил, сатиричен и мрачен, фантастичните раскази се пишувани во ’20-тите години на минатиот век и биле објавувани во тогашните актуелни весници и списанија. Во нив се разгорува целиот потенцијал и генијалност на Булгаков.

Во фокусот на вниманието е една подолга приказна со автобиографски елементи, каде што се раскажува за нестрплив талентиран млад писател. Тој ја започнува својата кариера и покрај општествената ситуација, бирократијата, граѓанската војна, тифусот и политичките превирања. Несомнено ќе уживате во светот на Булгаков.

Дарба – Владимир Набоков

Ова е последниот роман на Набоков напишан на руски јазик. Главниот лик - Фјодор Годунов-Чердинцев е млад руски емигрант. По завршувањето на студиите во Кембриџ, тој доаѓа во Берлин и сонува да напише книга. Романот е своевидна анализа и појаснување на причината поради која Набоков пишува. „Јас, просто, уживам да создавам загатки и да ги придружувам со елегантни решенија...“.

(O)Милена | Црнобело