Филмски викенд: Анимирани филмови

Постои општо прифатено мислење дека анимираните филмови се за најмладата генерација, но нема ништо поубаво од еден викенд поминат пред телевизор гледајки цртани филмчиња.

Тие се лесни, едноставни, шарени и прават да се смееме. Совршена комбинација за релаксација на мозокот преку овој не така возбудлив викенд што ни престои.

Ако имате помлади сестри или браќа, внуци или деца, тогаш тие ви се најдоброто друштво за овие филмови.

Уживајте во овој филмски викенд!

Hotel Transylvania (2012)

Оваа анимирана фамилијарна драма ни раскажува за здодевниот живот на една тинејџерка вампирка (која има 118 години).

Таа живее позади крајот на светот, далеку од сите луѓе, скриена во прекрасен дворец и тотално осамена.

Нејзиниот татко го изградил овој замок со цел да ја заштити од луѓето кои се виновни за смртта на нејзината мајка, и кои во очите на било кое чудовиште се најлошата врста на суштества.

На нејзиниот 118 роденден се собираат сите познати чудовишта од цел свет и прославуваат растоварени од потребата да се кријат од луѓето.

Но, едно младо момче ќе залута во замокот, и сега таткото вампир мора да манипулира со сите присутни, паралелно да ја организира забавата и да ги чува сите гости безбедни.

Приказната е прилично едноставна, крајот предвидлив, но има доста комични елементи кои ќе ве натераат да се смеете на глас. Филм кој раскажува за љубовта, неоснованата омраза и страв од непознатото.

Режија: Genndy Tartakovsky
Гласови: Selena Gomez, Adam Sandler, Kevin James, Andy Samberg

Brave (2012)

Анимирана авантура за непослушната и дива принцеза од Шкотска, Мерида, која е неразбрана од своите родители и сака да е слободна (да си игра со лакот и стрелата, претпоставувам).

Бидејки родителите од неа бараат да порасне и да ги превземе одговорностите што се очекуваат од неа, таа збеснува, налетува на вештерка во шумата и посакува да ја смени мајка и.

Очигледно вештерката знае само една магија, а тоа е да ги менува луѓето во мечки. Остатокот од приказната раскажува како принцезата со натчовечки напори пробува да ја скрши магијата, да си ги поправи односите со родителите и да ги поправи сите проблеми што ги створила.

Искрено овој анимиран филм малку ме разочара, постерот изгледа моќно а приказната е лигава и празна. Принцезата е премногу разгалена, а приказната слабо развиена.

Анимациите пак, се одлични, црвената коса на принцезата има хипнотизирачки ефект. Едноставно престанувате да ја следите приказната кога тие црвени локни се во преден план.

Филм створен за најмладата публика или за трошење време.

Режија: Mark Andrews, Brenda Chapman, Steve Purcell
Гласови: Stars: Kelly Macdonald, Billy Connolly, Emma Thompson

ParaNorman (2012)

Норман е малку чудно дете, тој има способност да гледа и да разговара со духови. Поради овој факт, никој не го сака, никој не му верува, никој не се дружи со него и сите го малтретираат.

Има само еден пријател, што е подеднакво чуден како него. Дури и сестра му и брат му кои се дел од популарните деца, не му веруваат и го малтретираат.

Но, кога една вештерка ќе активира стара клетва која ќе ги разбуди сите мртви, тогаш Норман влегува во акција за да го спаси градот.

Убаво брзо филмче со малку поостар хумор, хумор за возрасни. Но, сепак не е премногу сериозен филм. Ќе ве остави насмеани, расположени и релаксирани.

Анимацијата е правена по техника која малку е застарена, но тоа воопшто не се приметува и филмчево може да му конкурира на било кој филм од Пиксар.

Режија: Chris Butler, Sam Fell
Гласови: Kodi Smit-McPhee, Anna Kendrick, Christopher Mintz-Plasse

И.Т. | Црнобело