Напуштено куче си најде топол дом и уште 4 убави вести што нè израдуваа оваа недела

Детали

петок, 22 ноември 2024

Од „Лајка“ открија дека девојка вдомила едно од нивните кучиња, а учениците од гимназијата „Никола Карев“ од Скопје го промовираа „пет френдли“ клубот во училиштето, во кој ќе се грижат за бездомни животни, но ќе пробаат и да им најдат дом на некои од нив.

Убавите вести секогаш ни измамуваат насмевка и прават да се чувствуваме убаво, да ни се подобри расположението и денот да ни е повесел.

Па, така, и оваа недела споделуваме неколку позитивни вести, кои сигурно ќе ве „кренат“ и ќе ви внесат малку светлина во морето тмурни вести и црна хроника...

„Никола Карев“ стана прва „пет френдли“ гимназија кај нас

Во скопската гимназија „Никола Карев“ беше промовиран Пет френдли училишниот клуб, а со тоа тие станаа првото пет френдли училиште во Македонија.

Учениците веќе вдомија куче за кое поставија куќичка во дворот на гимназијата, а подготвија уште четири куќички за други локални кучиња.

Тие организираа и хуманитарен настан во дворот на гимназијата, каде што собираа храна, играчки, ќебиња за бездомните животни, а нивното мото е „Спаси живот, вдоми љубов“.

Ивана вдоми напуштено куче

Здружението за грижа и заштита на животните, „Лајка“, на Фејсбук објави фотка од девојка која вдомила едно од бројните напуштени кучиња за кои се грижат.

„Се вдоми Пајпер и со неа го затвораме поглавјето на вдомување на сите три кучиња кои беа напуштени од нивниот сопственик. Ти благодариме Ивана и со среќа“, пишува покрај фотографијата на Ивана и Пајпер.

Македонска таеквондистка освои бронза на турнир во Хрватска

Милјана Релиќ, нашата таеквондистка која настапи на Олимпијадата во Париз, освои бронза на турнир што се одржа во Загреб, Хрватска.

Со ова, таа почна да собира поени за пласман на Летните олимписки игри што ќе се одржат во Лос Анџелес во 2028 година.

Милјана овој викенд ќе настапи на турнир во Сараево и следниот викенд ќе се натпреварува на турнир во Романија.

Скопската зоолошка реновира неколку живеалишта

Пред почетокот на зимата, студените месеци и температурите по 0, вработените во ЗОО Скопје реновираа неколку живеалишта на животните.

„Секојдневно активно се работи на санација на живеалиштата, како и подготовки за зимските денови.

По реконструкцијата на кровот кај крокодилите, нашите вработени го санираа и живеалиштето на гибоните кои зимскиот период го поминуваат во внатрешниот дел“, велат од зоолошката и објавија неколку фотографии од тоа што го сработиле.

Лабина Митевска доби награда на меѓународен филмски фестивал

Нашата актерка Лабина Митевска е добитник на наградата Eurimages International Co-production Award, а веста за престижната награда е објавена од страна на Европската филмска академија.

На Фејсбук, покрај неколку фотографии од Лабина и нејзините филмови, пишува:

„Возбудени сме да најавиме дека наградата ја добива Лабина Митевска. Македонска продуцентка и актерка, која е дел од семејната продуцентска куќа Sisters and Brother Mitevski Production, ја добива наградата за нејзиниот извонреден придонес кон меѓународната ко-продукција.

Жирито вели: Наградата е посветена на талентот на семејниот бизнис кој со голема страст го посветува на европскиот филм“.

Доколку сакате да споделите некоја убава и позитивна приказна од вашето секојдневие, која ви се случила вам или на која сте биле сведок, пишете ни на Оваа е-адреса е заштитена од спамботови. Треба да ви е овозможено JavaScript за да ја видите.

А. Ј. | Црнобело