Денес е Крстовден - Ден за строг пост и покајание

Детали

петок, 27 септември 2024

Во минатото некои луѓе на овој ден воопшто не консумирале храна, а други пак јаделе само леб и грозје. Православните христијани денес го слават празникот „Крстовден“.

На 27-ми септември православните христијани го слават празникот „Воздвижение на чесниот и животворен крст“ во народот познат како „Крстовден“.

„Крстовден“ важи за еден од поголемите празници во есенскиот циклус. Според православната црква денес е ден на строг пост и покајание.

На овој ден се празнуваат два настани поврзани со чесниот крст, на кој бил распнат спасителот Исус, а тоа се наоѓањето на крстот на Голгота и неговото враќање од Персија во Ерусалим.

Поради неговата чудотворна моќ, крстот уште се нарекува и животворен крст, а се верува дека во темелите на неколку манастири во Македонија има делови од крстот на кој бил распнат Исус Христос.

Според верувањата, царицата Елена одлучила да го најде светиот крст и на Голгота биле најдени три крста.

За да се дознае кој од трите крста е оној на Христос, а кој на разбојниците кои биле распнати со него, патријархот Макариј ѝ дал предлог, крстот да го стават покрај покојникот чијашто поворка во моментот минувала од местото.

Кога покојникот бил ставен до христовиот крст, тој оживеал, по што се дознало кој од трите крста е оној на кој бил распнат спасителот, па затоа уште и се нарекува „животворен“.

Празникот „Крстовден“ се смета како „тежок“ празник, кога не се работи и се пости без масло.

Во минатото, некои луѓе верувале дека на овој ден воопшто не треба да се консумира храна, а други пак јаделе само леб и грозје.

Б. С. Б. | Црнобело