ЗОО Скопје по евтаназијата на слоницата Дуња: „Ни ја донесоа од циркус, беше изнемоштена и скоро и да не гледаше“

Детали

среда, 07 август 2024

По трауматичните фотки и видеа кои утрово се ширеа од мртвото тело на слоницата, од скопската зоолошка се огласија: „Ниту еден третман ниту операција не можеше да ја спаси, се констатираа повеќе здравствени проблеми кај Дуња, типични за шеестгодишна слоница, а одлуката на сопствениците од Белгија беше од стручниот меѓународен тим за да таа не страда“.

Во текот на денешниот ден, во медиумите и на социјалните мрежи се појавија фотки и видео кои покажуваат како мртвото тело на слоницата Дуња се пренесува со камион од Зоолошката градина во Скопје. 

Подоцна, од ЗОО Скопје се огласија дека слоницата не е угината како што се шпекулира, туку дека станува збор за евтаназија, одлука која била донесена од страна на сопствениците кои ја позајмиле на нашата зоолошка. 

Во продолжение прочитајте го целосното соопштение: 

Со голема жалост ве информираме дека во текот на вчерашниот ден (06.08.2024 год.), азиската слоница Дуња по насока на сопствениците кои ја позајмија на нашата зоолошка- „Pairi Daiza" од Белгија, одлучија со тимот експерти (ветеринар, офтамолог и сениор зоо негувател на тимот за слонови) кои изминатите денови ја прегледуваа слоницата донесоа одлука за евтаназија на слоницата.

Ниту еден третман ниту операција не можеше да ја спаси, а одлуката на сопствениците од Белгија беше од стручниот меѓународен тим за да таа не страда.

Последнава година слоницата Дуња појавуваше симптоми на длабока старост и изнемоштеност и се констатираа повеќе здравствени проблеми кај Дуња, типични за шеестгодишна слоница.

Дуња скоро и да не гледаше, имаше проблеми со вилицата и забите, а ден претходно беше направен преглед и констатиран е комплексен дентален проблем.

За процесот на обдукција и останките, Зоолошка градина Скопје ги следеше законите и правилата, како и консултации со тим од Факултетот за ветеринарна медицина.

Инаку нашата Дуња најголем дел од својот живот го има поминато во шведски патувачки циркус, патувајќи низ цела Европа. Со забраната за користење на животни во циркуси точки, оттаму Дуња и Даела патуваат во Белгија, во еден од најубавите паркови за слонови во светот- „Pairi Daiza", каде се констатира дека за жал поради трауматичното минато двете слоници Дуња и Даела нема да можат да живеат во социјална група со други слонови.

Оттогаш, во 2018 година доаѓаат во Скопје за да ги живеат нивните „пензионерски денови".

Посетителите на Скопје ЗОО од 29.09.2018 имаа прилика да уживаат и да се едуцираат со нивното присуство, а од вчера ја имаме самп нашата африканска слоница Даела, за чиј статус дополнително ќе се одлучи заедно со европската група за слонови.

Дуња, бескрајно ќе ни фалиш на сите, ни беше чест што имавме можност да се грижиме за тебе во твоите „пензионерски" денови.

M. M. | Црнобело