Димитар ја запроси саканата Стефани под ѕвезденото небо на Тунис (видео)

Детали

среда, 24 јули 2024

„Тој порача шише вино во соба, но не ми беше чудно зашто често ми прави романтична вечера и дома. Купил свеќи и рече дека не мора да палиме светло на тераса. Се доближи и ме праша: 'Ме сакаш?'. Потоа клекна на колена и продолжи на шпански: Te quieres casar conmigo?“, вели Стефани од Неготино за романтичното запросување во Тунис.

Стефани Ратковиќ (27) од Неготино и Димитар Димитровски (26) од Прилеп, живеат и работат во Шпанија, во градот Ваљадолид.

Стефани предава англиски јазик во приватна академија и држи онлајн часови по шпански јазик, а Димитар е професионален ракометар во Recoletas Atletico Valladolid.

По скоро 4 години врска, Димитар клекна на колено додека беа на одмор во Тунис и ја побара Стефани за сопруга, а таа прифати и ја сподели својата возбуда со пријателите на Инстаграм, каде што и објави видео од запросувањето.

За нивната љубовна приказна, која ја градеа и во Македонија, а потоа и во странство, но и за романтичниот момент кога Димитар ја изненади со прекрасен прстен, Стефани раскажа за CRNOBELO.com:

„Со Димитар сме во врска три години и девет месеци. Првиот контакт ни беше преку Инстаграм, каде тој ме додаде и прв ми пиша.

Се допишувавме некои 3-4 месеци пред првпат да се видиме во живо, бидејќи во тоа време јас бев во Хрватска и таму живеев околу 5 месеци.

Немав некои големи очекување, морам да бидам искрена, но со првиот 'дејт', ме освои целосно.

Димитар во тој период играше во ракометниот клуб 'Вардар' во Скопје, а јас ја завршував последната година на факултет.

По околу 5 месеци врска, тој доби понуда да игра во клуб во Романија, а јас само што завршив со испитите за осигурителен брокер и требаше да почнам со работа.

Разговаравме што понатаму и иако беа поминати само 5 месеци, се согласивме дека се гледаме заедно во иднина и дека ќе работиме на нашата врска. Јас оставив сè и решив да одам со него.

Не многу подоцна, планот се смени од Романија во Битола, бидејќи тој потпиша договор со ракометниот клуб 'Еурофарм Пелистер 2'.

Таа година беше вистински предизвик за нас. И двајцата првпат живееме со партнер и требаше време, трпение и многу разговор додека да ги осознаеме на навиките што секој ги има.

Со разбирање и компромис, сè е полесно.

По една година помината во Битола, се преселивме во Ваљадолид во Шпанија каде живееме веќе две години.

Јас уште од мала го обожавав шпанскиот јазик и сама научив да го зборувам, па кога Диме ми кажа дека се селиме во Шпанија, буквално скокав од среќа.

Со оглед на тоа дека живееме заедно повеќе од три години, знаев дека следен чекор е запросувањето, но искрено не очекував дека ќе биде сега.

Имаме во план патување на Канарските Острови, и мислев дека таму ќе се случи. Но, ме изненади во Тунис.

Продолжува на следната страница...