Христина Пан доби емотивна порака која влева надеж: „Ја имав истата дијагноза како ќерка ти, денес сум мајка на 3 деца“
- Детали
- среда, 03 јули 2024
„Во тебе ја видов силата на мајка ми, која во ист период како вас, на моја 9-месечна возраст се соочувала со истата дијагноза кај мене. 30 години подоцна јас сум мајка на три дечиња, иако надежта од докторите била 6 месеци живот“, стои во пораката која ја доби нашата инфлуенсерка Христина Пан, а која се бори со малигно заболување на ќерката Тара (2).
Македонската инфлуенсерка Христина Младенов, позната како Христина Пан, и нејзиниот сопруг повеќе од една година поминуваат низ тежок период, откако на ќеркичката Тара ѝ беше дијагностицирана неуробластома, пред нејзиниот прв роденден.
По долгиот период на лекување во Скопје, Љубљана и Турција, во кој беа вклучени хемотерапии и физичка изолација, оваа мајка-херој на Инстаграм Стори сподели емотивна порака која ја добила од жена, а која и самата имала неуробластома како бебе, и на која лекарите ѝ предвиделе само 6 месеци живот.
Христина вели дека пораката ја трогнала и дека по долго време се изнаплакала, но и дека зборовите од жената ѝ даваат огромна надеж дека Тара ќе биде добро.
„Кога дознав дека Тара е болна од малигна болест (неуробластома) и тоа во четврт стадиум, мислев дека само моето бебе е болно. Кога влегов во болница, видов за жал, колку не е тоа така.
Во последнава година, откако трае нашата борба, добивам скоро секој ден пораки од мајки кои поминале или поминуваат низ истото и сме си цело време поддршка едни на други.
Ова утро добив една поинаква порака, која допре толку до мене и ме расплака квалитетно после долго време.
Ја споделувам со нејзина дозвола за да биде поддршка за сите борци, мали или големи.
‘Здраво Христина. Те следам подолго време, а вчера случајно те видов во населба Влае со ќеркичките и не можам да не ти пишам, ми остана во мисли...
Немав видено до скоро каква дијагноза добила Тара и кога видов ме погоди многу.
Имено, во тебе ја видов силата на мајка ми, која во ист период како вас, на моја 9-месечна возраст се соочувала со истата дијагноза кај мене, неуробластома.
30 години подоцна јас сум мајка на три дечиња, иако надежта од докторите била 6 месеци живот.
Сакам само да ти пуштам сила и најголема љубов. До ден денес ја гледам грижата на мајка ми кон мене за секое едно нешто и можам да кажам само дека нема ништо посилно од родител што помонува низ истото.
Ви посакувам најбрзо оздравување и ви праќам многу љубов. Наредниот пат ќе ви пријдам, би ми било многу мило да ве запознаам’“.
За потсетување, Христина помина низ неколкугодишна борба со неплодност, но во 2022 роди близначки, Тара и Хана.
Брзо пред првиот роденден на девојчињата, таа и нејзиниот сопруг се соочиле со нов животен предизвик, откако лекарите ѝ дијагностицирале малигно заболување на Тара, Neuroblastoma Metastaticum.
По ова почнал долгиот процес на лекување, а неодамна Христина и Тара се вратија од Турција, каде што Тара помина низ фаза на хемотерапија, но успешно го заврши и овој процес на лекување.
„Ни останува радиотерапија во Истанбул и имунотерапија која што ќе ја прима тука на Детската клиника. Се молам и надевам дека најтешкото помина“, рече неодамна Христина за CRNOBELO.com.
Прочитајте и Христина Пан по 2 месеца поминати во болница со ќеркичката во Турција: „Се молам најлошото да е зад нас“
А. Ј. | Црнобело
Би можело да ве интересира:
Препорачуваме
Најчитани неделава
