Кучето Чопер по кое трагаа скопјани се врати кај сопственикот – купил автомобил за да го однесе во Германија
- Детали
- петок, 12 април 2024
Турист од Германија вдомил бездомно куче кое три месеци го чувал во Скопје. Но, неколку дена пред да се врати дома, кучето се изгубило. За среќа, кучето е пронајдено, а сопственикот купил и автомобил само за да може да го однесе во својата земја.
Приказната за кучето Чопер, која има среќен крај, сигурно ќе измами насмевка на вашето лице.
Чопер и дечкото од Германија што го вдоми, поминаа неколкудневна голгота откако кучето беше изгубено, но со помошта на скопјани, тоа е вратено назад.
Пред неколку дена, на Фејсбук групата „Миленичиња“ имаше објава за изгубено куче во Скопје од девојка по име Луис, која привремено го чувала кучето на Филип Ву додека тој бил во Германија, пред да дојде да го земе.
„Здраво, си го изгубив кучето. Последен пат е видено кај Holiday Inn 18:30 часот.
Носи зелено и сино каивче. Ве молам пиеше ми доколку го видите или најдете“.
Слични објави имаше и наредните неколку дена, а во една од објавите, девојката нагласува дека има уште три дена во Скопје и мора да го најде кучето пред да ја напушти државата.
Потоа, на Инстаграм беше споделено видео од јутјубер од Германија кој со Луис е дојден во Македонија.
Во видеото, тој кажува дека со девојката заедно го бараат кучето и дека мора да го најдат што побрзо, бидејќи тој треба да оди во Германија и сака да го понесе кучето со себе.
„Ако сте од Скопје, Македонија, или знаете некого од Скопје, ми треба вашата помош. Пред три месеца го најдовме ова улично куче кое почна да нè следи наоколу. Одлучив да оставам малку храна за него и се врати следниот ден.
Постепено почна да доаѓа секој ден за храна. И, еден ден, се чувствуваше доволно удобно за да влезе во нашиот апартман. Беше лудо. Секојпат кога заминувавме, тоа нè чекаше.
На нашиот нов пријател му го дадовме името Чопер“, раскажува тој во видеото.
Јутјуберот открива дека во период од три месеци, правел план како да го спаси од улица и потоа да го понесе со себе во Германија.
Најпрво планот им бил тој да отиде во Германија, да купи автомобил, да го регистрира, да го осигури и да вози до Македонија.
Па, со автомобилот да го однесе Чопер во Германија.
Тој отишол во Германија и го оставил кучето кај пријателката Луис. Но, додека се враќал кон Македонија, пријателката му кажала дека Чопер се изгубил.
Со девојката почнале да објавуваат во разни Фејсбук групи, а лепеле и летоци низ Скопје.
Приказната почна да се споделува вирално, а беше објавена и во македонскиот медиум meta.mk, од каде сега откриваат дека кучето е најдено.
Имено, семејство од Шуто Оризари стапило во контакт со нивната редакција изјавувајќи дека го нашле кучето.
Испратиле и фотографии, а кога туристите се увериле дека е кучето, отишле да го земат.
Девојката Луис ги сподели убавите вести на Фејсбук групата „Миленичиња“ со неколку фотки од средбата.
„Чопер се врати дома! Само сакав да кажам благодарам што заедницата ни помогна да го најдеме Чопер! Сите беа неверојатни“, стои во описот.
Поттикнати од пораката на новата иницијатива на Македонски Телеком „Да направиме место за вистински да се поврземе“, којашто поттикнува отвореност и меѓусебно разбирање, за што говореше и Горан Стефановски, редакцијата на CRNOBELO.com ќе направи повеќе место за добри вести и приказни кои инспирираат.
Спирова С. | Црнобело
фото: Фејсбук
Би можело да ве интересира:
Препорачуваме
Најчитани неделава
