Секоја чест! За неполн ден собрани скоро 1 милион денари за лекувањето на Срна

Детали

четврток, 07 март 2024

За помалку од 24 часа, откако родителите Трајче и Васка Панови испратија апел за собирање донации за лекување на нивната 3-годишна ќерка Срна, хуманите граѓани ги собраа потребните средства.

Откако вчера (06.03) во јавноста се прошири апелот за собирање донации за лекување на 3-годишната Срна, за неполн ден се собраа скоро 1 милион денари, односно средствата кои на родителите Трајче и Васка Цветаноска Панова им беа потребни за лекување на нивното дете.

„Срна има 3 години. Во октомври разви сепса поради уринарна инфекција што прејде во тешка форма пиелонефрит и остави трајни оштетувања на левиот бубрег.

Откриена е хидронефроза и камен во левото бубреже, а доби и нова сепса. Моментално е хоспитализирана.

Потребни се нови испитувања, оперативно лекување и целосно опоравување“, стои во апелот што беше објавен на ECrowd.mk.

Оттаму велат дека донираните средства ќе се искористат за сегашниот престој во болница и лекувањето на сепсата, за контроли, нови прегледи и за операцијата со која ќе се отстранат каменот и хидронефрозата.

„Сите овие интервенции ќе чинат најмалку 922.500 денaри“, открија родителите на Срна.

Нивниот апел со голема брзина почна да се шири на социјалните мрежи и за помалку од 24 часа се собрани 949.400 денари, преку донациите од хуманите граѓани.

На ЕCrowd, првата краудфандинг платформа во Македонија за граѓански организации, каде што се собираат донации за Срна, има апел и за лекување на уште едно девојче, 12-годишната Кара, за чие лекување се потребни 1,4 милиони денари, а досега се собрани само 45.000 денари.

https://www.facebook.com/odsrcezasitedecinja/posts/394333576574710?ref=embed_post

А. Ј. | Црнобело