Како си поминав на првата „Оскаровска гала вечер“ во Скопје, концерт посветен на филмската музика?

Детали

четврток, 29 февруари 2024

Шоуто „го украде“ Ана Петановска, која го остави срцето на сцена додека ги пееше Purple Rain и I Have Nothing, но и дуетите со младиот Христијан Тоневски. Како си поминав на првата „Оскаровска гала вечер“ во НОБ?

Вчеравечер (28.02) во Националната опера и балет во Скопје се одржа првата Оскаровска гала вечер. Ова беше ноќ исполнета со многу филмска музика и хитови кои низ годините освоија награда или беа номинирани на Оскар.

Иако знаев дека ќе биде убаво, тоа што се случуваше на сцената, навистина ме воодушеви.

Во пресрет на 96-тото доделување на Оскарите, кое ќе се одржи на 10 март, во Скопје се случуваше музичко-сценски настан кој ги заслужи сите аплаузи и пофалби.

Почна со црвениот тепих во фоајето на НОБ, а заврши со стоечки овации за сите кои се појавија на сцената и си го оставија срцето во тие неколку часа.

Од првите ноти на Moon River, до финалето со Shallow, ми се чини дека немаше некој што не уживаше во култните My Heart Will Go On, Take My Breath Away, Purple Rain, Shallow, Happy, Beautiful Maria of My Soul, Endless Love, I Have Nothing… но и во музиката од Godfather и Star Wars.

Низ вечерта со оскаровска музика нè водеше Миланка Рашиќ. Ги најавуваше сите изведувачи, па во свој стил на одличен познавач на Оскарите, таа за скоро секоја песна раскажа интересна приказна и ја дополни магијата на музиката што ја слушавме.

„Се надевам дека ова ќе биде прво од многуте дружења со оскаровска музика што ќе го имаме во иднина“, кажа таа на почетокот.

Освен со својот шарм, Миланка плени и со изгледот, а носеше раскошен фустан достоен за црвениот тепих на Оскарите.

Подеднакво впечатливи беа и изведувачите. Дамите за оваа гала вечер избраа фустани со светки, во впечатливи бои, а мажите настапија во класични костуми, но и во модерни креации.

А, на сцената навистина се случуваше магија. Шоуто „го украде“ Ана Петановска, која го остави срцето на сцена додека ги пееше Purple Rain и I Have Nothing, но и дуетите со младиот Христијан Тоневски.

Ни таа не криеше колку е среќна поради искрените реакции на публиката и аплаузот кој не стивнуваше по секоја нејзина изведба.

Ништо помалку одлични не беа и Наде Талевска, Весна Ѓиновска Илковска, Ана Мицковска, Горан Наумовски, Даниел Данн, Андријана Јаневска, Денис Димовски, Маја Гроздановска - Панчева и Игор Дурловски.

Меѓу македонските ѕвезди настапи и гостинката од Црна Гора, оперската пејачка Тамара Раѓеновиќ, која Миланка ја најави како последната ученичка на легендарната Монсерат Кабаље.

Секој настап беше проследен со силен аплауз, а публиката не криеше колку ужива во песните кои одбележаа неколку децении на светската филмска сцена.

Искрено, уживав и јас во тие два и пол часа. Се потсетив на некои малку подзаборавени песни, на филмови кои ми разбудија носталгија, па од концертот заминав со помислата: „Треба пак да го гледаме Robin Hood: The Prince of Thieves“.

Продолжува на следната страница...