Направи сам: Креативна Македонка од старите фармерки си направи нов кул модел (видео)
- Детали
- четврток, 11 мај 2023
Кога има креативност и желба за експериментирање, тогаш од старите фармерки можете да си направи нов модел, со кој нема да можете да минете незабележано. Чекор по чекор видео упатство од креативната Магдалена (20) од Тетово, која споделува детали за CRNOBELO.com...
Магдалена е креативна Македонка која на својот Инстаграм профил сподели „направи сам“ проект каде од старите фармерки си направи нов, кул модел.
Таа прво ги исече, па ги бојадиса со спреј, им стави безопасни и ги спои отсечените делови. Новиот модел изгледа навистина уникатно и со овие фармерки нема да минете незабележано.
Не можевме, а да не ја исконтактираме и да ја прашаме од каде оваа креативност. Дознавме дека Магдалена Јовановска е 20-годишна девојка од Тетово, која има завршено средно уметничко училиште за дизајн на ентериер.
Магдалена за CRNOBELO.com открива во која насока ѝ се движи животот сега и како се инспирира на тема мода:
„Одлучив моето школување да го продолжам надвор од Македонија. Се решив баш за Милано бидејќи тоа е градот на дизајнот и на модата.
Моментално студирам во ИЕД Милано како дизајнер на ентериер.
Оваа година имав можност да сум дел од Milano Design Week со мое самостојно дело. Креативноста отсекогаш ми била јака страна која ме исполнува , без разлика дали се работи за парче мебел или пак за мојот аутфит.
Во Милано, кој важи за еден од центрите на модата, секојдневно гледам различни типови на луѓе, на улици, во локали, во метро или пак на изложби и настани и секој е уникатен. Јас велам не е до брендот што го носиме, туку е до стилот што го имаме.
Тука секој носи тоа што го прави среќен и како се чувствува убаво. Сите имаат некое уникатно парче на нив и никој нема никакви предрасуди за истото.
Така јас се решив од стари фармерки да направам уникатно парче по кое сите ќе се свртат. Уште од малечка мојата мајка велеше Магдалена ти само сакаш да „скаструеш” нешто.
Отсекогаш сакав од ништо да направам нешто.
Една вечер спонтано се случи јас од моите стари фармерки да направам ново уникатно парче. Кај мене секогаш големите идеи се јавуваат во доцните часови.
Сè што ми беше потребно: сребрен спреј, креп трака за декоративни линии, безопасни и љубов, секако. Кога работиме со љубов и најтешкото нешто нема да ни претставува проблем да го совладаме.
Секогаш обожавам да го документирам процесот без разлика за што се работи и потоа споделувам на Инстаграм“.
Погледнете како изгледаше целиот процес:
С. С. | Црнобело
Би можело да ве интересира:
Препорачуваме
Најчитани неделава
