Масовна осуда за сајбер-булингот откако српска јутjуберка (21) си го одзема животот - реакции и во Македонија
- Детали
- четврток, 09 декември 2021
„Девојката потклекна на сите навреди, псовки, напади, омаловажувања“ – велат инфлуенсерите кои се здружија во осуда за сајбер-булингот, по веста дека млада српска јутјуберка Кика Гуќиќ на само 21 година си го одземала животот. Време е сите да се освестат колку големо влијание имаат онлајн навредите, за жал, невини, млади животи згаснуваат на најлошиот начин...
Младите јутубери и инфлуенсери се актуелни меѓу јавноста, а честопати се и мета на навреди, погрдни зборови и сајбер-булинг, што неретко резултира со страшни последици кај жртвите.
Јавноста од регионот е потресена по веста дека српската јутјуберка и инфлуенсерка Кристина Кика Ѓукиќ (21) си го одземала животот, а како што пишуваат медиумите и дел од нејзините колеги, таа и самата со години наназад била жртва на навреди и погрдни зборови.
Таа не успеала да ги издржи ваквите негативни коментари, потклекнала и за жал посегнала по животот.
Нејзината блиска соработничка, директорката на Balkan tube fest, Мира Владисављевиќ, во изјава за Telegraf.rs рече дека младата Кика која со години наназад беше актуелна на YouTube и на социјалните мрежи била жртва на интернет злоупотреби и сајбер-булинг.
Кика пред само пет дена го објавила своето последно видео на YouTube откако претходно неколку месеци не била активна, а рече дека имала намера сега да продолжи да снима видеа.
Нејзината главна мисија во видеата беше да докаже дека видео-игрите не се само за момчиња, туку дека девојките можат подеднакво добро да играат.
Девојката години наназад беше популарна меѓу младите во Србија, а беше актуелна и поради кавгата со јутјуберот Бака Прасе.
Таа објавуваше видеа со видеоигри, како и видеа на кои во целост облечена скокаше во Дунав, но имаше и видеоклипови на кои „запознаваше момци на Tinder“ или со мајка ѝ читаше перверзни коментари на социјалните мрежи.
За нејзините активности на социјалните мрежи, покрај големиот број позитивни коментари, честопати се наоѓале и злобни коментари, со навреди и лоши мисли заради кои веројатно западнала во депресија.
Како што беше наведено на нејзиниот официјален Инстаграм профил, Кика починала во вечерните часови во средата (08.12).
Известување ставила и нејзината другарка Лаура Тешановиќ, а заради тоа што во следните објави на Инстаграм Стори ги ставила и СОС броевите за превенција на самоубиства и пишувала на оваа тема, стана јасно дека младата девојка си го одземала животот.
Меѓу поголемиот број јутjубери и пријатели што се простија од Кика, со своја објава на Инстаграм Стори се огласи и македонскиот јутјубер Марко Марковиќ, познат како GP, кој остро го осуди сајбер-булингот и ја подигна свеста за тоа дека самоубиството е најлошото и најстрашното нешто што човек може да го направи.
На својот Инстаграм профил, македонскиот јутјубер напиша:
„Многу ме шокира веста за смртта на Кика. Уште повеќе причината за истата. Самоубиството е најлошото и најстрашното нешто што човек може да го направи. Колку и да се чувствува човек тешко и осамено, треба да е свесен дека ќе помине и тоа.
Илјадници вистински приказни има за како луѓето од најлошото дно успеале до врвот. И сè е можно. И сè ќе се оправи. Само самоубиството не…
Секако сите сме различни и секој различно поднесува тешко. Затоа ако знаете некој кој поминува низ лош период или пак тоа сте вие, не бидете сами.
Зборувајте со луѓе и дружете ги оние што се чувствуваат отфрлено. Верувајте, на некого самото ваше присуство му е доволно да биде среќен. И конечно, не ги навредувајте луѓето.
Зборовите можат некого да повредат. Тоа се случи денес. Почивај во мир Кика, никогаш не требаше вака да ја завршиш твојата приказна“ – порача тој, меѓу другото.
Во осуда на сајбербулингот застана и Лука Кривокапиќ, кој е популарен на социјалната мрежа ТикТок. Тој на Инстаграм Стори напиша:
„Шокирани сте? Би било добро кога би биле шокирани и од коментарите што ги добиваме, а што таа последните три години ги добиваше секојдневно. ’Умри‘, ’Да даде Бог да погинеш‘, ’Ти посакувам сè најлошо‘, ’Разболи сè, итн.
Па и онаа драма со Бака Прасе каде ѝ се ’се**вте‘ во животот заедно со него. Не знаете за граница. Тастатурата за жал му овозможи на секој малоумен имбецил да остави коментар и да плукне врз некого.
Сите ние што добиваме секакви коментари, главно некако ’сме глуви‘ за тоа, но сакале да признаеме или не, доаѓа миг кога ќе се насоберат сите тие сра*а што вие ги куцкате, изговарате, снимате. Некогаш е морничаво што сè сте во состојба да напишете.
И сега кога девојката потклекна на сите навреди, псовки, напади, омаловажувања… Сега сте во шок, сега е прекрасна, убава. Сега е кутра и сега е ангел… Сајбер-булингот е реален и не е во ред“ – порача тој.
За жал, ова е страшната реалност во која живееме, каде социјалните мрежи имаат огромно влијание врз младите луѓе.
Време е да се зборува отворено за ова, време е секој да понесе одговорност за своите постапки и да научи дека навредите се најсилното оружје кое може да биде кобно по нечиј живот.
Но, посегнувањето по животот не е решение. Важно е жртвите на сајбер-булинг да не се чувствуваат дека се во безизлезна ситуација и да се обратат кај блиски или стручни лица за помош.
Секогаш постои решение, но за жал, некогаш учиме на потешкиот начин, низ трагичната судбина на други луѓе...
Б. С. Б. | Црнобело
Би можело да ве интересира:
Препорачуваме
Најчитани неделава
