Сведочење на Коста Кецмановиќ за масакрот во „Рибникар“ – „Мајка ми бараше да бидам најдобар, затоа го направив ова“

Детали

вторник, 08 октомври 2024

„Сè уште не дознавме кој бил мотивот за масакрот“ – изјави адвокатот на родителите на убиените деца во училиштето „Владислав Рибникар“ во Белград. Детето–убиец Коста Кецмановиќ сведочеше на судењето против неговите родители, а судењето е затворено за јавноста.

Денес (08.10), во Специјалниот суд во Белград сведочеше момчето Коста Кецмановиќ кој на 3-ти мај минатата година изврши масакр во основното училиште „Владислав Рибникар“, при што уби 9 свои врсници, како и работникот задолжен за обезбедување Драган Влаховиќ.

Српските медиуми пренесуваа фотографии од неутешните родители на убиените деца, кои утрово се собраа пред судницата, а на судењето присуствуваат и родителите на Коста, Миљана и Владимир Кецмановиќ кои се обвинети за недозволено држење, носење и промет на оружје, како и за тешки дела против јавната безбедност.

Коста денес за првпат ја напушти Психијатарската болница каде што е сместен од денот кога го изврши масакрот, откако беше одлучено дека нему нема да му се суди за убиствата, затоа што имал само 13 години кога ги извршил.

Според дел од српските медиуми, иако не се знаеше точно дали Коста ќе прифати да сведочи против родителите, затоа што има законско право да одбие, тој сепак прифатил да застане на судската говорница и да одговори на сите прашања.

Коста денес одговараше на прашањата на јавниот обвинител, судијата, адвокатите, но и на прашањата на родителите на убиените деца, кои за него наводно, имале подготвено над 250 прашања.

https://twitter.com/Blic_online/status/1843592177881907399

Судското рочиште заврши во 13,45 часот, а речиси никој не сака да сподели детали за тоа што се случувало во судницата, со цел да не се повреди затворениот карактер на судењето.

Дополнително, Јавното обвинителство во Србија отвори предмет за „протекување“ информации во јавноста, од судењето кое целосно треба да се одвива во тајност.

„Со прашањата што денес му беа поставени не дознавме кој бил мотивот и зошто тоа се случило, но сметам дека денешниот исказ оди во правец на прашањето дали ќе дознаеме.

Неговото сведочење не е завршено и ќе продолжи на 17-ти октомври во оваа иста зграда“ – изјави адвокатот на родителите на убиените деца, Огњен Божовиќ, и нагласи дека не смее ништо повеќе да каже заради постапката којашто е затворена за јавноста.

Според пишувањата на српските медиуми, родителите биле мошне потресени при излегувањето од судницата.

Адвокатката на родителите на Коста, Ирина Божовиќ, пак, вели дека најверојатно никогаш нема да се дознаат причините за масакрот.

„Во оваа кривична постапка, ниту во која било друга постапка на друго место, ние нема да ги дознаеме причините за овој трагичен настан.

Сите причини се длабоко некаде во душата на тоа момче, кое за жал изврши злосторство, а претходно водеше еден целосно нормален и вообичаен живот, од аспект на сите што го познаваат“ – вели таа.

Инаку, Коста за време на судењето сведочел на говорница која со стакло била одвоена од родителите на убиените деца.

Според изјавите на присутните во судницата, на одредени изјави родителите плачеле, а на други пак, биле гневни.

Друг детаљ што се споделува е дека за време на сведочењето морале да интервенираат и лекарите кои биле пред судницата, затоа што во одреден миг на Коста нагло му се променила бојата на лицето.

Српски Blic пишува дека Коста посочил дека однесувањето на неговите родители влијаело врз тоа тој да ги изврши убиствата.

„Мајка ми постојано бараше да бидам најдобар. Се лутеше и викаше кога не бев најдобар.

Заради тоа што постојано бараше што е можно повеќе од мене, јас ѝ се лутев.

Тоа нејзино однесување влијаеше да го направам тоа што го направив. Да ги немав пиштолите на татко ми, не би го направил ова“ – наводно рекол Коста.

Од она што го пренесуваат српските медиуми, многу е веројатно сведочењето на Коста да биде доволно за неговите родители да завршат зад решетки.

Прочитајте и „Среќо наша, не знаевме дека злото демне“ - Потресна објава на мајка на девојче убиено во српското училиште „Рибникар“

Б. С. Б. | Црнобело