Моника Грковска, шминкерка во МНТ: „Сум нашминкала 12 актери/ки за 40 минути, забавно е да се работи со шегобијци како Сашко Коцев и сите останати“

Детали

среда, 15 март 2023

„Засега, рекордот изнесува 40 минути - 12 актери/актерки, со шишање на брада, обликување мустаќи, нанесување леќи... Знае да биде стресно кога се има малку време за промена, на малку време мислам кога имаме 20 секунди за да се преслече актерка, да се собере нејзината коса и да се стави периката, а тоа да изгледа средено“ - раскажува за CRNOBELO.com Моника Грковска, која работи како шминкерка во МНТ и раскажува анегдоти од зад сцена со Тања Кочовска, Сашко Коцев, Никола Ристановски и многу други... 

Моника Грковска (29) од Скопје работи како професионален шминкер во Македонски Народен Театар веќе 8 години.

Од мала имала талент за шминкање, а освен секојдневна шминка за настани, решила вештините да ги искористи за професионално шминкање на актерите во театар.

За CRNOBELO.com таа раскажува како изгледа оваа професија, колку е стресно кога треба да се нашминкаат и средат бради на голем број актери за кратко време, но и кога се прават мали промени среде претстава.

Моника открива какви се актерите зад сцена, додека се во шминкерна и се подготвуваат за својата улога, а вели дека е забавно да се работи со шегобијци како Сашко Коцев, Никола Ристановски, Гораст Цветковски, Александар Михајловски и многу други, а раскажува и една анегдота со Тања Кочовска.

Прочитајте го целосно интервјуто во продолжение...

Кога почна да работиш како шминкер во театар? Кој и како го препозна талентот?

Талентот за шминкање и стилизирање најпрво го препозна мојата баба, која често ми велеше дека сум „родена уметничка душа“, иако јас тогаш во тинејџерските години шминкањето го гледав и практикував само како хоби.

Не ја послушав и се запишав на медицина, но длабоко во себе не бев исполнета и немав визија гледајќи се себеси во бел мантил.

Подоцна, моето опкружување и моите другарки ми беа голем поттик и поддршка да започнам да се бавам професионално со шминкање.

Од малечка покрај обичната секојдневна шминка, сакав да правам и трансформации, маски и да направам нешто необично од некој лик.

Па така, после извесен период универзумот имаше друг план за мене и еве ме цели 8 години во мојот втор дом - Театарот.

Колку е голема разликата помеѓу обична шминка за настани и шминка на актери за претстава?

Разликата е голема затоа што театарската шминка пред сѐ треба да е квалитетна, покривна, истрајна и отпорна на сите тие рефлектори и сценски движења.

Најчесто таа треба да е добро матирана, да не дава отсјај (освен ако не треба наменски да свети или да делува дека актерот е „испотен“) и воедно да придонесе и во оформување на карактерот, односно ликот којшто се бара за одредена улога во претставата.

Покрај глумата на актерот, шминката, фризурата и костимот се огромен придонес за визуелниот изглед на еден карактер, додека пак обичната вечерна или дневна шминка служи за да се покрие некој недостаток и да се истакне природната убавина кај секоја жена или девојка.

Да не се претерува - да се нагласи она што ни го дала природата, а да се покријат таканаречените „несовршености“ е мојот совет, освен ако не е за некоја улога, маскенбал или тематска забава.

Како изгледа твојот работен ден во театар? Како ти се организирани ангажманите?

Со работа почнувам претежно попладне, бидејќи претставите најчесто започнуваат од 20 часот.

Во зависност од тоа која претстава се игра вечерта, ги подготвувам потребните шминки, перики, мустаќи и слично, а потоа пијам едно кратко кафе заедно со останатите колеги.

Се враќам во шминкерната и си пуштам тивка музика...

Сакам кога работам да има убава и опуштена атмосфера. Веќе околу 18 часот актерите доаѓаат и започнува магијата.

Дали ти си должна да ги нашминкаш сите актери за една претстава или сте поделени?

Ние сме две колешки и најчесто сме поделени, јас ја работам шминката, а колешката прави фризури, но, при поголем обем на работа и двете работиме наизменично и меѓусебно си помагаме.

Колку шминки имаш најмногу направено за најкраток временски период? 

Времето во театар е ралативно - некогаш работи за нас, понекогаш не, но на крајот сѐ се завршува на време и претставата може да започне.

Имавме претстави мјузикли во кои играа повеќе од 40 изведувачи, воедно актери/актерки, балерини, балетани, хор и ги спремивме сите за околу 3 часа.

„Мајсторот и Маргарита“ - над 30 актери, исто така за нешто помалку од 3 часа.

Засега, рекордот изнесува 40 минути - 12 актери/актерки, воедно шишање на брада, обликување мустаќи, нанесување леќи... 

Која ти била најтешка шминка досега и зошто?

Не би рекла најтешка… Можеби најпредизвикувачка ми беше шминката во „Мајсторот и Маргарита“, бидејќи имавме маски и SFX (special makeup effects) кои што најпрво ги направи наш познат маскер Горан Игњатовски, од кој што научив многу.

Потоа, јас го наследив и го работев тој дел правејќи рани, лузни, ставајќи и боејќи заби и др.

Продолжува на следната страница...