Моника Грковска, шминкерка во МНТ: „Сум нашминкала 12 актери/ки за 40 минути, забавно е да се работи со шегобијци како Сашко Коцев и сите останати“

Се подготвуваш ли однапред за одредени шминки на ликови или креативноста се раѓа на лице место? Дали добиваш конкретни насоки или е твоја целосна креација?

Од сѐ по малку би рекла. Секако, првично добиваме насоки од костимограф и режисер. Да видиме во која доба се игра претставата, дали е современа, историска и сл.

Потоа седнувам во гледалиште и гледам проба, па така се раѓаат идеи.

Има шминки коишто се целосно моја креација или пак заедно со актерот сме ги осмислиле на лице место.

Многу е важно како актерот се чувствува со одредена шминка, маска или перика и дали е доловен ликот за претставата.

Лично јас сум најкреативна кога работам под притисок - тогаш во мене се будат најдобрите идеи.

Какви се актерите додека се шминкаат пред претстава? Имаат ли некои ритуали?

Сите се различни, свои и единствени. Прво се облекуваат во костим, па доаѓаат на шминкање и веќе кога излегуваат од шминкерната можам да кажам дека се навлезени во ликовите.

Има такви коишто молчат и навлегуваат во улогата додека се шминкаат, има и такви кои повторуваат текст на глас сами или заедно со друг актер, пеат, кажуваат вицеви.

Воглавно владее една пријатна и возбудлива атмосфера, особено кога претставата вклучува многу актери.

Има ли некој од актерите кој ти е најлесно или најтешко да го шминкаш? И зошто?

Можеби во почетоците од мојата работа ми беше предизвик да нашминкам повозрасно лице. Но, после долго искуство и работа, сега би рекла дека со леснотија и уживање го работам ова, па така немам многу потешкотии додека шминкам.

Се случила ли некоја непријатна/смешна ситуација?

Хмм многу е тешко да се издвои затоа што постојано се случуваат смешни, понекогаш и стресни ситуации ама ќе издвојам една смешна.

„Седнува Тања Кочовска на стол. Почнувам да ја шминкам за мјузиклот „Чикаго“, таа седи со затворени очи, а јас нешто приватно нервозна, почнувам да ѝ ги цртам веѓите.

И така јас замислена цртам, цртам, цртам... На крај, Тања посегна да се види во огледало и што да види... Колкави веѓи сум ѝ нацртала.

Почнавме и двете хистерично да се смееме... И ја имаш Тања вика: „Ова не се веѓи, ова се црни облачиња, темни облаци ме надвјасаа...“.

И така сега, секојпат кога ѝ ги цртам веѓите се потсетуваме и се смееме за облачињата.

Кој од актерите е најголем шегобиец и секогаш внесува позитивна атмосфера зад сцена?

Уфф има многу такви...

Па најчесто во театар владее позитивна атмосфера, секако дека има и доста позитивци и шегобијци.

Тука се Сашко Коцев, Гораст Цветковски, Александар Михајловски, Тања Кочовска, Оливер Митковски, Никола Ристановски и многу други...

Секогаш знаат да расположат со по некоја анегдота, виц или имитација. Морам да признаам доста забавно е да си опкружен и да работиш со такви луѓе.

Дали си должна да присуствуваш таму во текот на цела претстава? Има ли корекции на шминка? Стресно ли е тоа ако се одвива брзински?

Освен што ги подготвуваме актерите пред претстава, се случува да имаат и промени на шминка и фризура за време на претставата да треба да стават перика, да треба да се искоригира или да се достави повеќе шминка, во зависност од тоа што се бара од тој лик.

Знае да биде стресно кога се има малку време за промена, на малку време мислам кога имаме 20 секунди за да се преслече актерка, да се собере нејзината коса и да се стави периката, а тоа да изгледа средено.

Но, затоа се тука пробите, за сите промени да бидат добро извежбани.

Имаш ли и друга работа покрај оваа? Се гледаш ли во театарот на долг рок? Кои ти се плановите?

Театарот е мојата прва љубов и приоритет, се разбира. Во слободно време кога сум во можност и немам обврски, работам како шминкер за реклами, ТВ серии, краткометражни филмови, документарци и шминка за приватни настани.

Театарот за мене не е само работно место, туку простор каде што можам да ја изразам својата креативност, талент и дарба, простор каде што се чувствувам како дома.

Засега немам други планови бидејќи сум исполнета, тука каде што сум - а тоа е МНТ.

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело