Иван Ајнштајн: Ако успеам да го преобразам светот во безгрижно дете, нема да има ни мене што да ме загрижува

Детали

понеделник, 27 август 2018

Го знаеме како рапер, јутубер, дечко со голем ентузијазам за животот. Човек, кој е познат на помладата генерација и чиј хумор знае да создаде завист. 

Да, тоа е Ајнштајн, не научникот Алберт, туку Иван Ајнштајн од Скопје, кој на самиот почеток од месец август ја објави својата нова песна Вдиши. За негово изненадување истата се искачи на #1 трендинг на YouTube во Македонија.

Вели дека ниедна песна ја нема работено со толку љубов и посветеност како Вдиши.

„Песната првпат ја снимив пред 2 години на некое рандом реге битче дочорупано од јутуб. Ми звучеше многу поубаво од тоа што очекував. Можно е тоа да ми беше првпат да се осмелам да запеам во моја песна, пошо нели, раперите не пеат, срамота е тоа... Толку се вљубив во песната што не можев да дозволам да ми остане во „архивата на нечуените“. Одлучив да биде целосно авторско дело, а не обична песничка снимена од досада. Мојот вечити продуцент Анѓело Николовски од Skopje Crew ми зготви убав бит, а Валентин Видовиќ – ValiSax смисли мелодија и отсвире неколку инструменти: гитара, бас, труба...

Благодарение на мојата пребирливост и желба за совршенство, овој процес траеше 2 години, за конечно да го добијам посакуваниот продукт и решив несебично да го подарам на мојата публика, која уште пред 2 години беше известена за постоењето на ова дело. Гордан Божиновски од продукцијата Urban Records со задоволство го сними и направи спотот за мојата омилена песна и тоа баш онака како што го замислував; One-Shot видео со многу позитивни личности во него“ - раскажува Иван.

Без да испадне контрадикторен, Иван за себе вели дека не е оптимист, туку напротив – песимист. Со тоа сака да каже дека секогаш го очекува најлошото и невозможно е нешто да го разочара.

Ако навистина се случи најлошото, утеха му е во тоа што не се ни надевал на подобро, а го прави среќен сé што е барем малку подобро од најлошото. Ова најубаво го објаснува со следниве стихови:

„Паѓаш во река, излагаш и сфаќаш дека
Секое мало парче од животот е среќа“

Иван Ајнштајн додава дека секогаш треба да го цениме и да бидеме благодарни она што го имаме, наместо да се грижиме за она што го немаме. Тоа според него е многу лесен трик за константно убав живот.

„Инспирација за песната ми е самото ова размислување за животот што го имам оформено и сакав да го споделам со сите“, открива Иван.

„Музиката е најдобро средство за јавно изразување, а јас се сметам за способен да ја направам. Помагајќи им на други луѓе, на некој начин со ова си помагам и самиот на себе, затоа што ако успеам да го преобразам светот во безгрижно дете, нема да има ни мене што да ме загрижува. Во овој момент секој треба да размисли и да одбере дали неговиот краток живот да го потроши во тага или радост“.

Вдиши е сосема ново и неочекувано достигнување во YouTube, а и во музичката кариера на Иван Ајнштајн. Како и за сé во животот, така и за ова, воопшто не очекувал дека песната ќе им се допадне на толку многу луѓе.

За него ова значи поминување на едно ниво и одење на следно, каде го чекаат нови предизвици и врати за отклучување. Самата посветеност што ја поседува Иван сведочи дека тој никогаш нема да престане да работи на достигнување на своите соништа, што истовремено му претставува и поттик да продолжи да дише.

Автор: Евгениј Хоуп | Црнобело