Светлана од Скопје: „Имам колекција од 754 книги дома, татко ми ми ја пренесе љубовта кон читањето“

По кој критериум ги подредуваш книгите?

Книгите најчесто ги подредувам по издавачки куќи, по автори. И по прочитани и непрочитани.

Би се обидела еднаш да ги подредам и по боја, но тогаш не би имале совршен ред за мене, но за да пробам како сето тоа би изгледало, зошто да не?

Кој ти е омилен странски, а кој домашен автор?

Книги имам од сите издавачки куќи, но од секоја издавачка куќа имам омилен автор, од секој жанр исто така.

На пример од „Матица“ автори на трилери би ги издвоила Донато Каризи, Тес Геритсен, Линдвуд Баркли, по драми Лусинда Рајли и Јона Греј.

Од „Сакам книги“ пиедесталот на трилери го зема Крис Картер, Себастијан Фицек, а драми би ја издвоила Кристин Хана.

Ако е од „Антолог“ тогаш се Ирса Сигурдардотир, Јуси Адлер.

Од издавачката куќа „Култура“ ги обожувам историските книги на Гортнер, од „Три“ го почитувам Мураками, Ју Несбе и многу други.

Има многу добри автори од кои на македонски јазик е преведена само една книга и издавачките куќи прекинале да преведуваат од истиот.

„Муза“ како издавачка куќа (која е сè уште релативно нова и во подем) би ја издвоила со убави книги, добри автори и превод и нешто поразлично од книгите кои сме навикнати да ги читаме.

Исто така „Или-Или“ и „Артконект“ имаат многу добра литература.

Од македонските писатели би ги издвоила Игор Станојоски, Јована Матевска Атанасова, Лилјана Пандева, Фросина Пармаковска, Гоце Смилевски, Венко Андоновски и уште многу други.

Македонија има да се пофали со многу квалитетни автори чии книги се преведени и на други јазици и се продаваат не само во Македонија, туку и пошироко.

Колку чини твојата колекција? Ти носат луѓето книги на подарок?

Не би знаела да кажам во пари колку чини, затоа што за мене оваа колекција е со непроценлива вредност.

Не би ја продала за ниедни пари на светов. Имам книги кои ги нема да се најдат во продажба, а се многу убави.

Да, книгата е најубавиот подарок кој би можел некој да ми го подари, иако е многу тешко да се одбере која книга би ми ја подариле.

Имам многу книги кои се подарени од драги личности и пријатели, некои кои поминале низ мојот живот, а некои се сè уште присутни, со многу убави посвети напишани на нив, кои не би ги дала никогаш.

Најубава посвета досега која ја имам (односно аманет) е на книгата Пиреј, која ми ја подари мојот татко многу одамна, а ја имам прочитано 3 пати.

Истата се однесува на неговите внуци (моите деца и децата на мојата сестра), дека им ја остава книгата Пиреј, како аманет да ја прочитаат и да разберат нешто од неа.

Се обидуваш ли на другите да им ја пренесеш својата љубов кон читањето?

Уште додека беа мали, многу мали на моите деца сум им читала секоја вечер.

Не сме легнувале без да прочитаме приказна, „Росица“ или некоја друга интересна книга за нивна возраст.

Иако едно време синот се заинтересира за енциклопедии и ги знаеше, и ги читаше, му ги имавме купено сите кои се наоѓаа во тоа време по книжарниците, некако со ова време на технологија и интернет му ја снема таа заинтересираност.

Ќерката знае да каже да прочита некоја книга, можеби на англиски, но сепак ја немаат таа љубов како што ја имам јас.

Којзнае, можеби ќе се сменат кога ќе созреат, па ќе им се роди таа љубов да читаат. Книгите ќе бидат тука, кога и да посакаат да прочитаат нешто.

Исто така, многу мои колеги и пријатели кои читаат, многу пати им давам препораки за некои книги кои ми имаат оставено особен впечаток.

Љубовта и желбата за читање едноставно е всадена во секоја личност различно, но јас како вљубеник во читањето едноставно и од срце им препорачувам да навлезат во мудроста и убавината на пишаниот збор.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело