Успешни Македонци низ светот: Лорета и Петре Стојановски 45 години имаат свој ресторан во Англија

Во тој период, како што ни појаснуваат, тие биле првите странци што одлучиле да живеат во Литлхемптон, но и да се осмелат да отворат сопствен ресторан.

Но, денес ресторанот „Вардар“ е местото што е посетено како од Македонците од дијаспората, така и од Англичаните од соседните градови на Литлхемптон, но и од Лондон и Брајтон.

Кои се омилените специјалитети што се служат во ресторан „Вардар“?

Ја прашавме Лорета за тоа кои се омилените специјалитети што се служат кај нив, а таа ни појасни дека на Англичаните им се допаѓа нивното јагнешко месо, но и мешаната скара, ребрата, колбасите, домашната плескавица…

Во „Вардар“ исто така се служи и традиционалната шопска салата, како и салатата со марула, млад кромид и варено јајце, а гостите често нарачуваат и таратор и макало…

Освен традиционалните македонски јадења, на нивното мени има и голем број специјалитети од другите европски кујни.

Ресторанот „Вардар“ е семеен бизнис, а со Лорета разговаравме во периодот додека тие напорно работеа на отворање на нов хотел.

„Во ресторанот работиме ние, нашето семејство, но имаме уште 10 вработени, а во хотелот ќе има простор за вработување на многу повеќе лица“ – ни појасни таа.

Ова е местото каде традиционално се организираат прослави и веселби по повод сите поважни македонски празници, а во просториите на „Вардар“ имале чест да ручаат или да вечераат голем број македонски делегации и гости од татковината.

Копнежот по татковината

Но, и покрај големиот успех на професионален план, Лорета признава дека копнежот по родната грутка бил толку голем што со Петре во еден период се обиделе и да се вратат во Македонија, купиле куќа во Скопје, но работите не излегле според плановите.

„Брзо ја продадовме куќата во Скопје, и купивме друга куќа во Крани, Претор. Сега секоја година ги носиме внуците на одмор таму.

Сакаме да знаат од каде потекнуваат и од каде им се корените“ – ни нагласува Лорета.

Лорета и Петре се пример за истрајност и упорност. Тие се доказ дека со напорна работа и труд може да се остварат сите соништа, иако почетоците не се лесни и најчесто е потребно да се работи деноноќно.

Може да се каже дека веќе 45 години тие се вистински амбасадори на македонската кујна, традиција и култура во Англија.

Нивниот ресторан е местото каде што може да се соберат сите Македонци од тамошната дијаспора и да вкусат барем дел од специјалитетите, но и да ја задоволат потребата за нешто автентично македонско, да зборуваат на мајчин јазик, но и да остварат контакти и познанства со другите Македонци, коишто потрагата за „подобро утре“ ги одвела токму во Англија.

©CRNOBELO.com Забрането преземање и копирање. Крадењето на авторски текстови е казниво со закон.

Б. С. Б. | Црнобело