Стефан Спирковски за авантурата на Исланд: „Патував 30 часа, бев сместен во кампер, а ме воодушеви пловењето со китови“

Детали

четврток, 14 ноември 2024

„Гледањето китови е дефинитивно една од факултативните екскурзии што секој треба да ја посети. Китовите навистина изгледаа импресивно и грандиозно и ова беше спектакуларно и незаборавно искуство“ - вели за CRNOBELO.com Стефан Спирковски, кој беше на патување во Исланд.

Нашиот фитнес модел, Стефан Спирковски (31), е страстен авантурист и голем љубител на патувањата.

Тој неодамна, со поголема група свои пријатели, замина на патување во Исланд.

Таму, во еден ден доживеа промена на 4 годишни времиња, потоа посети бројни вулкани, виде орка китови додека пловеше со брод, уживаше во убавините на поларната светлина, се капеше во термални извори на температура од околу 0 степени и дневно поминуваше по околу 300km за во една ден да види што е можно повеќе од островот.

Во текот на патувањето, тој своето воодушевување го споделуваше со следбениците на социјалните мрежи.

А сега, за CRNOBELO.com, го раскажа своето искуство од авантурата на северот на Европа:

„На Исланд отидовме организирано, преку агенција. Таму бевме 6 дена - тргнавме од Скопје до Софија и оттаму летавме до Осло.

Преку Норвешка стигнавме до Кефлавик на Исланд.

Патувањето траеше околу 30 часа бидејќи не постои директен лет од Скопје.

Ги посетивме скоро сите атрактивни места благодарение на тоа што бевме со кампери и го направивме популарниот Ring Road на Исланд.

Најпрво го истраживме Рекјавик и некои од најинтересните знаменитости на градот. 

Бевме вкупно 10 кампери и обично поминувавме околу 200-300km дневно.

Се сместувавме во кампови кои се одлично организирани и ги пружаат сите услови.

Убавината кога си сместен во камп е заедничката дружба која ја имавме во вечерните часови, со спремање на нашите омилени јадења.

Нашето сместување во тие 6 дена беа собите на тркала и можам да кажам дека тоа беше навистина неверојатно искуство.

Спиевме во самите кампери, само ги поврзувавме на струја во камповите за да имаме греење и струја внатре.

Цените во Исланд беа највисоки од сите дестинации кои сум ги посетил досега.

Ќе направам една мала споредба само - една чорба со ракчиња и леб чинеше 20€, додека кај нас е околу 4-5€.

Исландскиот хот дог, кој чини 7€, е иконска улична храна во земјата и е познат по уникатниот вкус и комбинацијата на состоки.

Наречен pylsur, овој хот дог се прави со мешавина од јагнешко, говедско и свинско месо, што му дава посебен, благ вкус.

Традиционалниот исландски стил на сервирање вклучува „co cè” (meo öllu), што значи дека добивате сенф, кечап, суров кромид, пржен крцкав кромид и посебен сос од мајонез и сладок сенф наречен Remolaði.

Доколку пазарите во маркет може да поминете поевтино и цените немаат драстична разлика од кај нас.

Еден од најповолни маркети на Исланд се вика Bonus, па таму пазаревме и е моја препорака за оние што ќе одат во иднина во земјата.

Цената на аранжманот за авионски карти, кампери и сместување во камп чинеше 1.300€ по човек.

Дополнителен трошок е горивото и патарините, кои вкупно чинат 300€, а ги делат двајцата кои се во камперот.

Дополнитен трошок се факултативните излети и храната, кои се, нели, по ваш избор.

Продолжува на следната страница...