Александра од Скопје ја посети Шри Ланка: „Ја направив фамозната фотка од воз на инфлуенсерките, но јавниот превоз е патешествие“

Детали

вторник, 17 септември 2024

„Сите што сакаат да ја направат познатата фотографија, обично букираат втора или трета класа, каде што се отвораат прозорците и вратите. Возот се движи многу бавно, но секој совесен турист треба да знае дека не треба да се доведе во животозагрозувачка ситуација за една фотографија за Инстаграм“, споделува Александра од Скопје за CRNOBELO.com за посетата на Шри Ланка.

Александра од Скопје, менаџер за комуникации, патува со сопругот низ светот и ги документира спомените на својот Инстаграм профил и на блогот Two Pins On a Map.

По подолга пауза од патувања поради пандемијата, таа повторно беше на незаборавно патување, овој пат на островот во форма на солза, Шри Ланка.

За CRNOBELO.com го споделува своето искуство оттаму:

Колку земји имаш посетено досега и кои ти оставиле најсилен впечаток?

Ги немам броено, ама околу 15-тина се сигурно.

Секоја земја и секоја култура се уникатни и ми понудиле незаборавни искуства, но ако морам да издвојам, тоа би биле Јужно Африканската Република, бидејќи таму бевме на меден месец и Исланд - земјата каде што се чувствував како да сум „надвор од овој свет“.

Овој пат зошто токму Шри Ланка?

Сосема случајно се погоди изборот на дестинација. Бидејќи последното далечно патување ни беше пред пандемијата, во 2019-та година, знаев дека треба да се вратиме во „колосек“ со нешто поразлично од тоа што досега го имаме искусено.

Алгоритамот на Инстаграм веројатно ме слушна, и ми се појави легендарната фотографија со парот на возот што оди од Кенди до Ела, a потоа и многу други фотки од оваа дестинација.

Фамозното позирање од воз

Следеше истражување за земјата, и нормално - купување на авионски билети.

Голем одлучувачки фактор беше и фактот што ќе имам шанса да ги видам „шриланканските“ слонови, едно од моите омилени животни.

Како изгледаше, колку беше скап и тежок патот дотаму?

Како и секое далечно патување, бевме спремни на тежок пат.

Полетавме од Софија, со трансфер во Истанбул, и по неколкучасовно одложување на летот, и 8 и пол часа во авион, стигнавме на аеродромот во Коломбо.

Цената на летовите беше малку поевтина од вообичаеното, бидејќи бевме во период помеѓу двата монсуни, што за многумина не е посакуваниот тајминг за посета на Шри Ланка, но се потврди она што илјада пати го слушнавме таму - Шри Ланка е дестинација вредна за посета низ целата година.

Првиот впечаток ти беше…

Влажен воздух, луд сообраќај и гостопримливи и пријателски настроени локалци. И остана овој впечаток до крајот на патувањето.

Што ти се допадна најмногу?

Мешавината од различни искуства што ги нуди земјата. Ми се исполни и надмина секое очекување кое го имав.

Фактот што можеш да бираш дали ќе уживаш во историското наследство, или можеби прекрасната природа и животни, или егзотичните плажи, или од сè по малку - лесно е секој да најде некоја заедничка нишка со Шри Ланка.

Диви животни, плажи, храмови, кој е најсилниот адут на оваа земја?

Шри Ланка е едно од оние места кои оставаат длабок впечаток кај секој љубител на природата и авантурите.

Најмногу ме воодушеви неверојатната разновидност на природните пејзажи – од бујните чајни плантажи во Ела, до мирните плажи на јужниот брег и раздвижените улици во поголемите градови. 

Покрај природата, Шри Ланка е вистинско богатство и за љубителите на културата и историјата.

Древните градови како Сигирија нудат неверојатен поглед во минатото, додека шарените пазарчиња ја раскажуваат живописната култура на овој народ. Шри Ланка е место каде што традицијата и природата се спојуваат на уникатен начин.

Продолжува на следната страница...