„Од Скопје до Лефкада патував 8 часа, ме восхити старица што скокна со падобран - Зошто постојано се враќам на рајскиот остров во Грција?“

Детали

четврток, 14 септември 2023

„Последниве 10-12 години секогаш кога почнуваат муабетите и плановите за летување, има барем еден од моето друштво што знае да каже: „А да одиме на Лефкада?“ Поради убавите плажи, сите нијанси на сино што се прелеваат во Јонското Море, поради прекрасните спомени што ги имаме, но и оние што ги создаваме секојпат кога сме таму, и оваа година решивме летната сезона да ја завршиме токму на Лефкада“.

Многумина велат дека Лефкада е најубава за летување во септември, кога морето е најтопло, а воздухот не е влажен. Се покажа дека тоа е вистина.

Веднаш штом решивме дека сакаме да поминеме неколку дена на рајскиот остров во Грција, испративме порака до газдите на вилата во која бевме сместени неколкупати претходно.

За среќа, имаа слободна соба токму во времето кога ни одговараше, иако решивме да резервираме буквално во 5 до 12.

Патувањето до Лефкада трае околу 7-8 часа без паузи, кога се оди со автомобил. Но, широките автопати, живописните предели и 49-те тунели кои водат до островот, го прават патот интересен, а времето поминува брзо.

За мене секојпат посебно доживување е кога треба да го поминам тунелот под вода, кој се наоѓа во близина на Лефкада.

Она необично чувство кога се спуштате под земја и знаете дека поминувате скоро 1 километар под вода, а насекаде околу вас е море, не се опишува. Додека се возевме, често си подголтнував за да го намалам притисокот во ушите.

Но, брзо потоа нè дочекаа гужвите во Лефкас и првата попатна станица – шопингот во Лидл.

Освен секојдневните намирници, си купивме и тазе печива од пекарницата (и неизбежните локумадес) и тргнавме кон Цукаладес, селце на западната страна на островот, кое е сместено помеѓу главниот град Лефкас и Агиос Никитас.

Влеговме во вилата, и буквално само ги извадивме куферите, облековме костими за капење и тргнавме кон Катизма, плажа до која со автомобил стигнавме за неполни 10 минути.

Плажата на која последниот пат скоро и да немаше лежалки со наплата, сега беше преплавена со кафулиња и чадори за сонце. Но, имаше и доволно широки делови каде што секој што сака може да си постави своја лежалка.

Необично за Лефкада и за Катизма попладне, но морето беше неверојатно мирно и совршено за пливање. Додека уживавме во првото капење, од вода го гледавме зајдисонцето, а дури потоа излеговме надвор.

Продолжува на следната страница...