5 лековити зачини кои мора да ги имате во кујната

Сите знаеме дека разноврсната исхрана богата со овошје и зеленчук, поволно се одразува на здравјето, како и внесувањето доволно течности и редовното вежбање. Но, она што честопати го забораваме е дека постојат уште некои намирници кои се исклучително здрави, а треба да ги користиме при подготовка на храната.

Станува збор за зачините, кои исто така може мошне позитивно да влијаат на организмот, било да се работи за борба против алергиите и разните болки, или, пак, превенција од појава на рак или срцеви болести.

Доколку здравјето и виталноста ви се од примарна важност, ова се петте лековити зачини кои задолжително мора да ги имате во својата кујна:

1. Куркума

Позната како индиско злато, куркумата поседува моќни медицински својства, коишто може да ги елиминираат штетните материи од телото. Но, уште поважно – таа ги подобрува мозочните функции и помага во спречување на срцевите болести. Делотворна е и за намалување на симптомите на артритис, како и Ајцхајмерова и Паркинсонова болест.

2. Црн пипер

Црниот пипер го подобрува варењето на храната, намалувајќи ја опстипацијата и останатите дигестивни проблеми. Истражувањата покажуваат дека е добар и за превенција, но и лекување на ракот, а помага и при депресија, висок крвен притисок, ослободување од зависноста од цигари кај пушачите, како и проблемите со штитната жлезда.

3. Цимет

Циметот е зачин што најчесто се користи за приготвување на слатки десерти, а делотворен е за намалување на нивото на шеќер во крвта. Спроведеното истражување потврдува дека кај луѓето што боледуваат од дијабетес тип 2, а секојдневно користат цимет во исхраната, шеќерот во крвта се снижува. Тој е добар и за намалување на холестеролот, а сите би требало да го консумираат, бидејќи помага и при превенција од рак, срцев удар, како и труење со храна. 

4. Мускатно оревче

Овој ароматичен зачин содржи миристицин, етерично масло кое може да се пронајде во билките како морков и целер. Докажано е дека мускатното оревче го намалува холестеролот, депресијата и aнксиозноста, а ја подобрува меморијата и зголемува сексуалната желба.

5. Ѓумбир

Ѓумбирот го олеснува и поттикнува варењето, ја намалува надуеноста и желудочните тегоби, а ги спречува и грчевите. Покрај тоа, има и аналгетски, смирувачки и антибактериски својства, а поради антихистаминското дејство, се користи и при лекување на алергиите. Идеален е за јакнење на имунитетот и ублажување на симптомите на настинка. 

М. А. | Црнобело