Кокос бајадера, готова за 20 минути

Нема кој не е слаб на егзотичниот вкус на кокосот, посебно кога е помешан во колачи и торти.

Ова е еден од оние стари рецепти кои се пренесуваат од колено на колено и лесно може да го послужите кога ви треба нешто за на брзина.

Не се пече, треба само добро да се излади. Се подготвува 20 минути, а се јаде двојно побрзо.

Потребни состојки:

• 150ml кокосово млеко (може и обично)
• 170g шеќер
• Ванила
• 250g путер
• 200g кокосово брашно
• 400g млеко во прав
• Желе бонбони (количина по желба)
• 2 листа обланди

Подготовка:

Млекото, путерот и шеќерот стоплете ги на рингла и мешајте додека го додавате млекото во прав и кокосот.

Желе бонбоните исечкајте ги на мали коцки и измешајте ги во смесата.

Може да додадете и коцки чоколадо наместо желе бонбони, само внимавајте смесата да биде целосно оладена за да не се растопат.

Филот распоредете го на еден лист од обланда, а со вториот покријте го.

Замотајте во пластична фолија или ставете во тава и изладете неколку часа.

М. Д. | Црнобело