Што да готвите оваа недела? Брзи рецепти за сочен ручек

За да ги скратите мислите и грижите околу ручекот кој секој ден мора да биде брз, а вкусен, ви нудиме мала помош. Ваше е само добро да се снабдите со намирници и да одвоите половина час во кујната.

Еве во какви специјалитети можете да уживате оваа недела:

Пилешко во зеленчук

Состојки:

• 200g шпагети
• 400g пилешки гради
• 3 лажици вино
• ½ лажица ѓумбир во прав
• 1 лажица суви зачини по желба
• 3 лажици соја сос
• Масло
• 150g пченка
• 100g црвена пиперка
• 100g кромид
• 100g морков
• 1 лажица цветен мед

Подготовка:

Додека шпагетите се варат, пилешкото месо исечкајте го на коцки. Зеленчукот измијте го, излупете го и исечкајте го на тенки ленти. Пченката сварете ја или купете веќе сварена, конзервирана.

Месото испржете го во тефлонска тава на загреано масло и тргнете го на страна. Во истото масло пропржете го и зеленчукот. Кога ќе омекне зеленчукот, вратете го месото и измешајте ги сварените шпагети заедно во тавата.

На крај додајте го виното и зачините, промешајте го и медот и оставете уште 10тина минути на тивок оган.

Шпагетите со пилешко и зеленчук се служат топли, со додатни сосови по желба.

Печен компир со сирење и сланина

Состојки:

• 1,5kg компири
• 500g сирење
• 300g сланина

Подготовка:

Сварете го компирот во солена вода. Откако ќе се свари излупете го и во сад за печење редете компир исечкан на кругови, рендано сирење и ситно сечкана сланина. Завршете со уште еден ред компири и одозгора зачинете.

По желба, додајте 2-3 лажици хопла или павлака за компирот да биде посочен.

Печете околу 20 минути на 200 степени.

Ориз со печурки и зеленчук

Состојки:

• 2 шолји ориз
• 800g свежи печурки
• 1 главица кромид
• 500g спанаќ
• Зелена пиперка
• Црвена пиперка
• Жолта пиперка
• Масло
• Суви зачини

Подготовка:

Пропржете ги печурките заедно со кромидот на врело масло, а спанаќот и оризот варете ги во посебен сад.

Кога ќе завршите со нив, подгответе ја тавата за печење. Размачкајте малку масло, па ставајте еден ред ориз, еден ред печурки. Повторете ја постапката неколку пати.

Од горе додајте ги ситно сечканите пиперки, посолете и додадете зачини. Полијте уште малку масло и печете 30тина минути на 180 степени.

Потпечени плескавици

Состојки:

• 500g мелено месо
• 1 кромид
• 2 парчиња леб
• 3 јајца
• 4dl павлака
• Сол, бибер
• Зачини
• Масло

Подготовка:

Лебот потопете го во вода, издробете го на парчиња и додајте го ситно сечканиот кромид. Меленото месо, заедно со 1 јајце, сувите зачини, сол и бибер измешајте ги во садот.

Рачно измешајте ја смесата и обликувајте мали плескавици, па пропржете ги од двете страни неколку минути.

Потоа, наредете ги во тава за печење, изматете ја павлаката со двете јајца и полијте ги. Печете половина час на 200 степени и послужете со свежа салата.

Пица со палента и печурки

Состојки:

• Тесто за пица
• 200g палента
• 100g пармезан
• 200g кашкавал
• Маслиново масло
• 100g сечкани печурки

Подготовка:

Сварете ја палентата, а кога ќе биде при крај додајте го пармезанот, кашкавалот и малку сол.

На тестото за пица додајте ја палентата, наредете ги печурките и зачинете.

Нарендајте уште малку кашкавал и печете 15тина минути.

Рижото со морски плодови

Состојки:

• 2 шолји ориз
• Чаша бело вино
• Лук или кромид
• 3 лажици маслиново масло
• 1l супа од коцка
• 200g маринирани печурки
• 200g морски плодови
• Зачини по желба

Подготовка:

Кромидот или лукот пропржете го на врело масло неколку минути, а потоа додајте го оризот и пржете неколку минути. Додајте го виното и варете го оризот додека потполно не испари течноста.

Малку по малку, додавајте ја супата со постојано мешање додека не ја впие оризот.

Одвоено сварете ги морските плодови, па кога рижотото ќе биде готово, промешајте ги во него.

Зачинете со бибер, малку сол и пред служење исечкајте малку магданос.

Полнето бело месо

Состојки:

• 4 парчиња пилешки гради
• 4 парчиња сланина
• 4 парчиња кашкавал
• 1 лажица масло
• 2/3 шолја пилешка супа
• 1 лажица густин

Подготовка:

Со остар нож направете дупка во средината на секое парче месо и наполнете го со ситно сечкана сланина и парчиња кашкавал.

Зацврстете со чепкалки и секое парче месо пржете го на висока температура додека не потемни. Потоа, пржете уште 10 минути на средна температура за да се растопи внатрешноста.

Во супата додадете ја лажицата густин, па откако ќе го послужите месото прелијте го со овој сос.