Топли пијалаци со зимска арома

Зимата сè уште не започнала, но веќе почнавме да војуваме со ниските температури.

За да извојувате победа на вкусен и ароматичен начин, подгответе си некој од овие 3 топли пијалаци и почастете се себеси и најмилите.

Божиќна топла чоколада

• 100g црна чоколада за готвење
• ½  лажица шеќер
• 2 лажици еспресо
• ½ лажица цимет
• 1dl вода
• 1 лажица кора од портокал
• 4 шолји млеко
• 1 лажица мелени бадеми
• Стапчиња цимет за украсување
  
  

Подготовка:

Чоколадата, шеќерот, еспресото, циметот, кората од портокал и водата загрејте ги на тивок оган. Мешајте додека чоколадото не се стопи и варете околу 5 минути. Заедно со бадемите, добиената течност измешајте ја со млеко, но не дозволувајте да зоврие.

Послужете во големи шолји и декорирајте со стапчиња цимет, рендано чоколадо или шлаг.

Празничен пунч

• 1l црно вино
• ½l црн чај
• ½l рум
• 1 портокал
• 1 лимон
• 500g шеќер
• 1-2 лажици цимет
• Арома од ванила по желба
  
  

Подготовка:

Во длабок сад ставете го црниот чај, виното, сокот од лимон и портокал, циметот и варете на тивок оган и внимавајте течноста да не зоврие. Мешавината претурете ја во стаклен сад и додајте го шеќерот. Додадете го румот и аромата од ванила, добро промешајте и послужете.

Служете во стаклени чашки, со стапчиња цимет или парчиња портокал.

Црвена топла чоколада

• 0,3dl кампари
• 0,3dl бренди
• 0,3dl млеко
• 1 лажица слатка павлака
• 1 лажица чоколадо во прав

Подготовка:

Ставете го млекото, павлаката и чоколадото во прав и варете. Откако ќе ја тргнете течноста од оган, додајте ги алкохолните пијалаци.

Послужете во стаклена шолја и декорирајте со што и да посакате - слатка павлака, чоколадо, цимет, ванила...