Грешки при пазарење храна заради кои трошите повеќе пари од потребното

Речиси секој ден одиме во некој супермаркет за да пазариме и никако не можеме да научиме кои работи не треба да ги правиме.

Навиките кои ги имаме, барем некои од нив, може сериозно да му „наштетат“ на нашиот буџет.

Со оглед на тоа што ретко кој ги забележува, ние сме тука да ви кажеме каде се вашите грешки при пазарењето.

Научете како да заштедите при купување, без да го жртвувате квалитетот:

Погрешен редослед на пазарење

Многу често не знаете како да го ограничите бројот на производи кои ги купувате. Но, кога веќе сакате да купувате многу, одбирајте здрави намирници.

Ако не можете да одолеете на потребата да ја наполните корпата или количката, почнете со пазарење од делот за овошје и зеленчук. Овде ќе ја наполните корпата со здрави работи и потоа ќе има многу малку простор за останатите нездрави намирници на кои само фрлате пари непотребно.

Не ја знаете цената на производите кои редовно ги купувате

Обидете се да ги запомните цените на производите кои редовно ги купувате. Така нема да може да бидете изманипулирани од лажни попусти кога цената останува иста, а пишува дека се намалени. Знаејќи го ова, ќе можете да ги искористите вистинските попусти.

Не планирате однапред

Ова не само што ќе ви го отежни пазарењето, туку ќе имате и проблем со „составување домашно мени за ручек“. Испланирајте го однапред неделното мени, и така секогаш ќе знаете што да купите за да ги подготвите сите оброци. Плус, нема да купувате непотребни намирници.

Не обрнувате внимание на тежината на производите

Замислете дека има 2 слични пакувања на путер на полицата, а едното од нив е многу поевтино. Не се избрзувајте да го купите поевтиното, пред да ја проверите тежината.

Можеби тоа што е поевтино има помала тежина, па во зависност од соодносот на цената и тежината на двата производа, некогаш е попаметно да го купите она што е малку поскапо, а има повеќе содржина.

Не пробувате нови производи

Многумина постојано ги купуваат истите производи од истиот бренд, плашејќи се да пробаат нешто ново и различно. Но сепак, производителите на нови непознати производи често продаваат квалитет за пониска цена.

Не се плашете да експериментирате. Освен што ќе заштедите пари, ќе откриете и повкусни или поздрави јадења. Сепак, не мора да значи дека секогаш ќе биде така, но вреди да се проба.

Не обрнувате внимание на попусти кои продавницата ги објавува

Со технологијата, дел од маркетите имаат веб сајтови каде ги објавуваат тековните попусти на производите и можете секогаш да ги следите. Ако немаат ваква опција, тука се секогаш флаерите каде ги пишува сите акции.

Така ќе можете да ги споредите цените и да знаете од каде и кога да купите одреден производ.

Ги избегнувате евтините производи

Многу житарици, шеќер, сол или зачини, може да се најдат за разумни цени. На пример, обично спакуваниот шеќер е исто толку добар како и оној кој е спакуван во поинтересен дизајн и е поскап.

Бирате производи кои се во првиот ред на полицата

Ако сакате да ги најдете најсвежите производи, секогаш барајте ги поназад на полиците. Продавачите намерно првиот ред го резервираат за храна на која наскоро може да и истече рокот, за побрзо да се продадат.

М. М. | Црнобело