Зошто и колку жените се здебелуваат за време на менструација – Може ли да се спречи?

Подуеност, зголемена телесна тежина, лошо расположение - ова се само некои од знаците дека жената е во „оние денови“. Зошто и колку во просек се здебелуваме за време на менструација и постои ли начин тоа да се спречи?

Некои жени немаат никаков проблем со менструацијата, а за други е вистинско измачување: подуеност, зголемена телесна тежина, лошо расположение, малаксаност…

Голем број од жените прават сè што е во нивна можност за да го избегнат здебелувањето за време на менструација: здрава исхрана, избегнување одредена храна, вежби, медитација… Сепак, кога наутро ќе застанат на вагата таа покажува дека пак качиле некое кило – зошто е тоа така?

Британската докторка Ели Рајнер за Good to Кnow појаснува дека во просек некои жени качуваат од 1 до 2 килограми кога имаат менструација, а тоа се должи на промената на хормоните во телото.

Главен виновник за зголемената телесна тежина е естрогенот, а кога неговото ниво е високо, тој исто така предизвикува и променливо расположение, анксиозност и депресија.

„Зголеменото ниво на естроген (што го достигнува својот врв за време на менструација) може да предизвика задржување на поголеми количества вода во организмот, поради што се чувствувате подуено или подебело“ – вели таа.

Од друга страна, пак, намалувањето на нивото на прогестеронот (хормонот што ја подготвува матката за бременост) за време на менструалниот циклус може да предизвика опстипација, што дополнително придонесува за зголемување на телесната тежина.

Што можете да направите за да го намалите зголемувањето на телесната тежина за време на менструацијата?

За жал, подуеноста и зголемувањето на телесната тежина не можат да се избегнат во целост за време на менструацијата, но постојат неколку работи што би можеле да ги земете предвид доколку сакате следниот циклус да го поминете малку полесно:

Пијте многу вода

На овој начин ќе се осигурате дека вашето тело нема да задржува многу течности.

Колку помалку пиете вода, толку повеќе вашето тело регистрира дека имате недостаток на вода и почнува да ги задржува течностите.

Избегнувајте солена храна

Избегнувајте да јадете солена храна или јаглехидрати. Оваа храна може да доведе до дехидратација и задржување на вода.

Бидете активни

Иако можеби немате волја да станете од кревет, вежбите ќе ви помогнат во намалувањето на подуеноста и ќе го подобрат работењето на дигестивниот систем.

Б. С. Б. | Црнобело / Фото: depositphotos.com / freepik.com