Низ илустрации: Како се пренесува корона вирусот во соба, кафуле и училница?

Што се случува кога седите повеќе од 4 часа во затворена просторија како ресторан, дали е можно да се пренесе преку воздухот, колку луѓе може да се заразат од еден човек во една затворена просторија, зависно од мерките, проветрувањето и времетраењето на средбата, прикажано низ илустративни примери. 

Корона вирусот зема силен замав со есенскиот бран, а со оглед на тоа што доаѓаат студени месеци, собирањето во затворени простории станува голем проблем, бидејќи трансмисијата е многу полесна отколку во летните месеци на отворено.

Токму затоа, насекаде низ светот се носат нови мерки, кои предвидуваат контрола на собирањата во затворени простории, но и генерално се забранети поголеми групирања со членови надвор од семејството.

Сепак, со самото тоа што луѓето се во затворени простории многу почесто, ризикот за пренесување е секако поголем.

Веќе сите знаеме дека вирусот се шири преку капките кои заразените личности ги испуштаат преку зборување, кашлање и кивање, и аеросолите кои се задржуваат во воздухот, а друга личност ќе ги вдише или ќе дојдат во контакт со очите.

Но, поголем проблем претставува тоа што истите тие аеросоли во затворена просторија може да се задржуваат подолго во воздухот посебно кога не се вентилира, па вирусот да се пренесе дури и ако не сте во директен контакт со заблелната личност.

Секако дека начинот на пренесување во овој случај зависи од многу фактори и не значи дека буквално во секое можно сценарио истиот се пренесува, но добро е да знаете кои се разликите во секое сценарио.

Ќе се потрудиме илустративно да ви го доловиме начинот на пренесување во простории преку неколку различни сценарија, зависно од користените мерки за заштита.

Истражувањето и илустративниот приказ е првично направен и објавен од EL PAIS, од каде што се и преземени приказите, а ние ги одвојуваме најважните работи во продолжение.

Собир на луѓе во соба за дневен престој  - 6 луѓе се собрани во дом, а еден од нив е заболен.

Сценарио 1 - После 4 часа без безбедносни мерки

Независно од практикувањето на безбедна дистанца, ако 6 луѓе поминат 4 часа во затворена просторија без вентилација, со гласно зборување, без маска, а еден од нив е заразен – 5 од нив ќе се заразат, според научниот модел во оваа методологија.

Сценарио 2 – После 4 часа, со користење само маски 

Ако се носат маски, 4 луѓе се во ризик да се заразат. Само маските не можат да заштитат ако изложеноста на инфекцијата е премногу долга.

Сценарио 3 – После 2 часа, со проветрување

Ризикот од инфицирање е значително намален, ако групата носи маски, го скрати времетраењето на собирот и ја проветрува просторијата, може да се зарази еден човек.

Угостителски објект во затворен простор - без отворени прозори и вештачка вентилација, со намален капацитет за 50%, има 3 вработени и 15 гости

Сценарио 1 – По 4 часа, без безбедносни мерки за дополнителна заштита

Во најлошото сценарио, ако не се преземат дополнителни мерки за заштита, 14 лица ќе бидат инфицирани по 4 часа престој во објектот.

Сценарио 2 – По 4 часа, со носење маски постојано

Ако постојано сите носат маски, ризикот од пренесување на инфекција ќе се намали на 8 случаи.

Сценарио 3 – По 2 часа, со вентилирање на просторијата и скратено времетраење

Ако просторијата се проветрува природно или вентилира со добар уред за вентилација, и се скрати времето поминато во објектот, само едно лице има ризик да се зарази.

Во училиште – училница со 24 ученици и заразен наставник

Сценарио  1 – По 2 часа, без никакви безбедносни мерки

Ако се поминат 2 часа во училница со заразен наставник, без никакви мерки за заштита, постои ризик дека до 12 ученици ќе бидат заразени.

Сценарио 2 – Ако сите носат маски, како единствена дополнителна мерка

Ако сите носат маски, се намалува бројот на ученици кои може да се заразат на 5. Се наведува дека може да се зарази кој било ученик независно од близината до наставникот, заради распространетоста на аеросолите во невентилирана просторија.

Сценарио 3 – По 1 час, во вентилирана училница и скратено времетраење

Ако училницата се проветрува за време на часот, природно или вештачки се вентилира, и ако по секој 1 час има пауза за целосно освежување на воздухот, ризикот за зараза драматично се намалува на можно 1 заразено лице.

Она што е важно да се запомни, е дека колку подолго сте во затворена просторија без вентилација со заразена личност, толку се поголеми шансите за зараза на другите личности околу неа.

Гласното зборување и пеењето, помагаат многу побрзо да се прошири заразата, заради поголемиот број на испуштени капки кои во поголема количина може да се задржат во воздухот и да се вдишат од останатите.

На следната илустрација може да ја забележите разликата помеѓу заразена личност која молчи, која зборува нормално и која зборува гласно и дозата на респираторни капки во секоја од трите сценарија, кои стигаат до другите личности кои може да ги вдишат.

На сајтот каде овие калкулации се првично објавени, наведуваат дека методологијата која е користена за калкулација на ризикот на зараза е според алатка направена од Хозе Луис Хименез, атмосферски хемичар на Универзитетот Колорадо.

Целосната оригинална статија со детални прикази можете да ја погледнете ТУКА. 

М. М. | Црнобело