Како да препознаете дека сте доживеале топлотен удар и како да си помогнете?

Топлотниот удар е најсериозен облик на повреда во топлите денови кога сте изложени на директно сонце и високи температури, односно во повеќето случаи се третира како итен случај.

Група која најмногу страда од топлотни удари се лицата над 50 години, но тоа не значи дека младите и децата се поотпорни.

На топлотниот удар најчесто му претходи чувство дека телото ви гори, исцрпеност и несвестици, а се јавува заради „откажување“ на вродениот механизам за контрола на температурата на телото.

Први симптоми по кои ќе познаете дека сте доживеале или некој доживеал топлотен удар:

• Внатрешна температура од 40,5 степени
• Забрзана работа на срцето
• Главоболка
• Вртоглавица
• Чувствителност на светлина
• Недостаток на пот и покрај жештината
• Црвенило и сувост на кожата
• Слабост во мускулите
• Грчеви
• Мачнини и повраќање
• Отежнато дишење и губење на воздух
• Забрзано дишење
• Промена во однесување - конфузност, дезориентација или панични напади
• Несвестица

Прва помош

Ако се сомневате на топлотен удар, веднаш повикајте брза помош. Секое одложување на лекарска помош може да биде фатално.

Додека ја чекате брзата помош:

• Тргнете се на ладовина
• Задолжително раскомотете ја облеката, ништо не смее да биде стегнато
• Пијте течности
• Пробајте да ја спуштите температурата на телото со ладење на челото, ладни облоги или туширање