Што е азбест и како може да предизвика рак на белите дробови?

Што е азбестоза?

Азбестозата е заболување на белите дробови предизвикано од азбест.

Ситните влакна азбест кои се вдишуваат може да создадат мали рани на белите дробови и со тоа да го отежнат дишењето.

Нема лек за болеста, но постојат третмани со кои можат да се контролираат симптомите.

Азбестоза се јавува кај луѓе кои се изложени на азбест подолг период и работниците во индустрии каде се користи минералот се соочени со најголем ризик.

Покрај отежнатото дишење, може да се јават симптоми како болка во градите, кашлица и замор.

Како азбестот предизвикува рак?

Кога ќе вдишете азбест, микроскопските влакна може да останат во белите дробови со години.

Со текот на времето, тие може да предизвикаат воспаленија и оштетувања на белодробното ткиво, а тоа може да води до рак.

Што е мезотелиом?

Мезотелиом е вид рак на мембраната која ги штити повеќето внатрешни органи.

Најчесто се јавува на мембраната околу белите дробови, а вдишувањето азбест е една од почестите причини.

Овој вид рак обично се шири брзо, па затоа и се дијагностицира во подоцнежен стадиум, поради што е тешко да се излекува.

Третманот на секоја личност е индивидуален, во зависност од целокупната здравствена состојба, како и во кој стадиум е ракот.

Што се плеврални болести?

Плевра е мембрана околу белите дробови, а во категоријата плеврални болести спаѓаат сите заболувања во оваа област.

Постојат неколку заболувања во оваа област, од кои дел можат да бидат причинети од вдишување азбест.

Третманот зависи од самото заболување и симптомите кои ги покажува пациентот.

Спирова С. | Црнобело