Пилинг на лице - навечер: Kога треба да ги правите третманите за убавина за да бидат ефикасни?

Кожата е најмалку чувствителна веднаш откако ќе ви заврши менструацијата, па за да чувствувате помалку болка, депилирајте се во овој период од месецот.

Некогаш не е доволно само да направите некој третман за убавина – исто важно е и кога го правите.

Некои третмани се поефикасни навечер, некои е препорачливо да ги правите во зима, а некои е најдобро да ги оставите за слободните денови.

Кога треба да ги првите најчестите третмани за убавина?

Правете пилинг навечер

Навечер, кожните клетки се регенерираат побрзо, па најдобро е да правите пилинг на лицето во тој период.

Покрај тоа што подобро ќе ја исчистите кожата, навечер таа подобро ќе ги впие корисните и хранливи состојки, па продуктот за пилинг ќе биде поефикасен.

Депилирајте се веднаш откако ќе ви помине менструацијата

Поради хормоналните промени, чувствителноста на кожата кај жените се менува постојано.

Непосредно пред и за време на менструација, нашата кожа е најчувствителна, што значи во овие денови депилацијата би била најболна.

Од друга страна, откако ќе помине менструацијата, чувствителноста е на најмало ниво, па ќе чувствувате помала болка.

Нанесувајте ги лосионите за самопотемнување кога сте слободни следниот ден

Потребни се неколку часа за да забележите каков било ефект од лосионите за самопотемнување. А, дури откако ќе го забележите ефектот, можете да воочите дали сте нанеле повеќе на некои делови од телото и дали тенот е рамномерен.

Поради ова, препорачливо е да ги нанесувате овие лосиони кога сте слободни следниот ден за да имате време да ги исправите грешките.

Лосионот за тело нанесувајте го по туширање

По туширањето, порите на кожата се темелно исчистени и кожата подобро ќе го впие лосионот.

Покрај тоа, кога кожата е целосно чиста, не постои ризик да ги „заглавите“ нечистотиите во порите со лосионот, а со тоа го намалувате ризикот од појава на мозолчиња.

Ласерските третмани за отстранување влакна треба да се изведуваат во зима

Препорачливо е да правите ласерски третмани за отстранување влакна во постудените месеци.

По овие третмани кожата е почувствителна и треба да избегнувате директна сончева светлина недела-две, па затоа е најдобро да ги правите кога времето не е многу сончево.

Не ги лакирајте ноктите навечер

На лакот за нокти можат да му бидат потребни и неколку часа за целосно да се исуши, особено ако сте ставиле подебел слој.

Па, ако ги лакирате ноктите навечер, сигурно ќе ги „залепите“ и истриете од перницата или креветот и ќе го уништите маникирот.

Спирова С. | Црнобело