Како да му помогнете на детето ако има мачнини при патување?

Не го терајте детето да јаде сосила, не му дозволувајте да седи на телефон или таблет... Како може да му помогнете на детето што добива мачнини при возење за патувањето да ви помине непречено?

Сезона е на летни одмори и патувања, а голем број родители за време на патувањето се соочуваат со проблеми, затоа што нивните деца се склони кон мачнини и гадење додека се возат во автомобил.

Мачнината за време на патување се случува како последица на тоа што мозокот добива контрастни информации. Односно, внатрешното уво регистрира дека автомобилот се движи, а очите не.

Мозокот станува збунет, па кај детето прво се јавува чувство на неудобност, кое се претвора во мачнина и на крај завршува со повраќање.

Како да му помогнете на детето?

Ако веќе знаете дека вашето дете има проблеми и најчесто има мачнини додека патува во автомобил, би требало да обрнете внимание на неколку важни работи.

Поглед во далечина

Додека се возите, насочете го детето да гледа во далечина или во некоја точка надвор од автомобилот. Можете да играте игри со забележување и да разговарате со него за работите што ги гледате.

Обезбедете свеж воздух

Добро би било ако прозорецот од страната на детето е отворен малку и избегнувајте автомобилот да мириса на храна.

Исто така, не му дозволувајте на детето да чита, да игра видеоигри или да гледа видеа на екранот на телефонот.

Правете пауза за време на возењето

Идеално би било на секои 2 до 3 часа возење (па дури и почесто ако има можност) да правите паузи од по 15-тина минути во кои ќе му дозволите на детето да излезе од автомобилот.

Ако забележите дека детето станува бледо или почнува да се поти, застанете најбрзо што можете на првото соодветно место, каде што има сенка.

Најдобро е да се потрудите детето да не поврати во автомобилот, затоа што потоа на сите ќе им се слоши.

Возете бавно и доколку можете патувајте ноќе

Најдобро е да избегнувате нагло да кочите или да правите нагли движења додека возите. Добро би било да изберете што е можно порамен пат, без многу кривини, искачувања и височини.

Ако можете, најдобро е да тргнете на пат ноќе, додека детето спие.

Внимавајте на храната пред патување

Пред патување, најдобро е да се избегне тешка храна и нема потреба да го залевате со течности и вода.

Добро е да му дадете бисквити, крекери, банана и никако немојте сосила да го терате да јаде.

Ако во автомобилот немате клима, тогаш запомнете дека вода треба да му давате почесто, но во помали количества.

Лекови против гадење

Во аптеките се достапни лекови против мачнини, но запомнете дека овие лекови не треба да ги земате на своја рака без претходно да се консултирате со педијатар, кој ќе ви ја каже точната доза и ќе ви каже на колку време треба да му ги дадете на детето.

Б. С. Б. | Црнобело