Идеални за завршеток на летото: Најромантичните грчки острови создадени за љубовни парови
Грција - земја со вековна историја, космополитски градови, некои од најубавите плажи во светот и со сигурност една од најромантичните земји за парови кои бараат место каде што можат да уживаат во шармот на нивната љубов.
За среќа, разноликите острови во Грција нудат по нешто за секој џеб, вкус и стил, без разлика дали се работи за забава, тиркизно море, песочни плажи или места од културно значење.
Во продолжение за вас ги издвоивме 6-те најромантични грчки острови создадени за љубовни парови:
Миконос
Помеѓу мај и октомври, Миконос oстанува една од главните дестинации за забава до раните утрински часови и токму поради оваа причина овој остров го доби прекарот „грчката Ибица“.
Покрај незаборавното ноќно излегување, овој остров нуди и прекрасни ресторани, бутици, продавници за сувенири и стари градби кои датираат од антиката.
Главниот град на островот, кој го носи и името Миконос (Chora), е особено популарен. Во него се наоѓа и најромантичната населба наречена Мала Венеција, позната по своите бели и сини куќи и калдрманите улици полни со кафулиња и продавачи на гиро и сувлаки.
Миконос располага со околу 20 плажи и секоја од нив нуди нешто посебно - Elia, Psarou и Platys Gialos се познати по лудата забава и луксузните барови, а Agios Ioannis и Agrari нудат совршен мир и спокојство, но и многу можности за нуркање.
Општо земено, најдобрите плажи се на јужниот брег на островот, заштитени од налетите на северните ветрови кои можат да бидат особено силни помеѓу јули и август.
Милос
Меѓу најромантичните грчки острови е и Милос, кој е вистински скапоцен камен на Егејското Море и каде се кријат некои од најмагичните плажи во овој дел на Грција.
За среќа на оние парови кои сакаат да се држат настрана од љубопитните погледи и вревата на популарните одморалишта, Милос е неспоредлив за овој тип на бегство во мир и тишина.
Уникатниот шарм на ова островче почнува на уникатните пејзажи и продолжува на чудните карпи кои ги опкружуваат плажите со смарагдното море, но и на самиот факт дека токму на Милос во 1820 година е откриена статуата на Венера де Мило, која моментално се наоѓа во Лувр.
Целиот остров изобилува со глетки од исклучителна историска важност, подводни пештери, катакомби, антички амфитеатри и што е најважно, плажи од бајковит бел песок, од кои некои се достапни само со чамец или мали чамци кои можат да ве одведат до нив.
Крит
Не само што Крит е најголемиот остров во Грција, туку тој е и еден од оние острови кои нудат безброј можности за совршен романтичен одмор.
Неговата позиција на мапата е исклучително поволна, бидејќи отвора можности за истражување на други острови во областа, особено Родос и Санторини, кои исто така се меѓу најромантичните грчки острови за парови.
Крит изобилува со археолошки локалитети и знаменитости од исклучителна важност, но подеднакво е привлечен поради своите колоритни пејзажи и плажи кои се совршени за романтични моменти.
Дури и ако сте еден од оние парови кои сакаат „жива“ романса исполнета со активности, од пешачење и разгледување на знаменитости до возење велосипед или параглајдерство - Крит е островот за вас!
Санторини
Овој остров е веројатно еден од најпрепознатливите острови во светот, а својот уникатен шарм несомнено го должи на совршено белите куќи и сините покриви кои стојат како венец високо на карпите и нудат неверојатен поглед на хоризонтот.
Иако важи за еден од поскапите острови, одморот во Санторини дефинитивно вреди за секое евро.
Санторини не може да се пофали со рајски плажи и тиркизни мориња, но тој поседува шарм што не може да му парира на ниту еден остров во Грција, па дури ни во светот.
Каде и да се најдете ќе ве воодушеви глетката која се протега до бесконечност, а зајдисонцата на овој остров остануваат врежани длабоко во меморијата.
Лефкада
Лефкада е фантастична опција за романтичен одмор поради неколку причини. Покрај тоа што е многу лесно да се стигне со автомобил (Лефкада е поврзана со копното со подвижен мост), на овој остров можете да најдете прекрасни вили, одлични ресторани и плажи кои го одземаат здивот.
Доколку Лефкада ви е дестинација за ова лето, најдобро е да ја посетите со автомобил и со темпо кое најмногу ви одговара.
Неспорни по убавина се Porto Katsiki и Egremni каде што ќе треба да се помачите да најдете место доколку не пристигнете во раните утрински часови.
Katisma е прекрасна плажа, но и една од најдобро организираните, бидејќи нуди изобилство од барови и лежалки, а во екот на сезоната можете да уживате во неверојатни бранови.
Покрај нив, дефинитивно не треба да ги пропуштите плажите Milos, Kalamitsi и Agiofili кои никогаш не се преполни со посетители и се идеални за одмор за двајца.
Родос
На Родос ќе имате впечаток дека патувате низ времето. Елегантните вили, тесните улички со калдрма, средновековните градби и античките ѕидови го прават овој остров единствена дестинација за создавање романтични спомени.
Покрај Миконос, Родос е уште еден остров кој е познат по својот луд ноќен живот, но и по своите фантастични ресторани и таверни.
На островот можете да најдете неколку агенции кои нудат екскурзии со автобус и брод со цел да посетите што е можно повеќе места кои пленат со извонредна убавина и историско наследство.
Родос поседува над 40 плажи, почнувајќи од оние со барови, ресторани и лежалки покрај морето до оние кои се речиси диви и често не толку посетени, што ги прави совршени за одмор со саканата личност.
Мила М. | Црнобело
Би можело да ве интересира:
Препорачуваме
Најчитани неделава
