Ајде на Бахами!

Кој го чека летото со душа, еве можност барем на кратко да отпатува со мислите до Бахамите. Бахамите се островска држава во Атлантскиот океан.

 

Архипелагот од 700 острови покрива површина од околу 160.000 метри квадратни од Атлантскиот океан.

На островот New Providence се наоѓа и главниот град Nassau во кој живеат 2/3 од населението. Тропската клима и природните убавини се причина зошто важат за една од најпопуларните туристички дестинации на светот.

Andros е најголем остров на Бахамите. Се наоѓа во западниот дел, а останатите позначајни отрови се на северот.

Најголем дел од Бруто Домашниот Производ (повеќе од 60%) е резултат на туризмот. Културата на Бахамите е европска измешана со африканска како резултат на трговијата со робови.

Англискиот јазик е официјален јазик кој го разбира целото население од кое 85% се црнци. Средство за плаќање е Бахамскиот долар кој има еквивалентна вредност со американскиот долар.

Бахамите се посебно познати по тоа што Кристофер Колумбо прв стапнал на островот Сан Салвадор во југоисточниот дел. Тогаш на Бахамите живееле околу 40.000 индијанци. Подоцна сите се поробени и нивното друштво набргу исчезнало.

Првите англиски доселеници се населиле на островот во 1650-та година, а со доаѓањето на гувернерот Вудс Роџерс во 1718 година, службено стануваат дел од Британското царство.

На чело на државата е кралицата Елизабета II, а ја претставува гувернер генерал кој се избира по препорака на владата.

На Бахамите може да пронајдете најразновидна исхрана. Препорачуваат да ги пробате локалните специјалитети и морски плодови.

Превозот не е проблем бидејќи таксистите се достапни во секој момент, како и можност за изнајмување возила, мотори па дури и лимузини.