4 работи кои стилистите веднаш би ги исфрлиле од вашиот плакар

Веројатно во својот орман имате облека која не сакате да ја носите, или онаа која ви се допаѓа, но едноставно не ви одговара. Можеби дел од неа се ваши драги и омилени парчиња, но советот на стилистите е да им кажете „збогум“ што поскоро.

Нејзиното име е Микаела Ерлангер. Таа е една од најпознатите и најбараните стилистки во светот, за што во голема мера придонесе и нејзиниот ангажман околу изгледот на две познати дами – Лупита Нионго и Џенифер Хадсон.

Стилистката направи список на облека која треба да „исчезне“, за конечно да завладее ред во плакарот.

Ако и во вашиот дом се наоѓаат овие „скапоцености“, тогаш време е да се ослободите од нив:

1. Распар чорапи

Секој од нас има цела колекција од поединечни чорапи (бидејќи машината за перење редовно ја „јаде“ другата). Ерлангер советува дека првото нешто кое треба да го направите е да го ослободите вашиот плакар од „осамените“ чорапи. Ќе си го олесните животот, особено во утринските часови.

2. Бели маици кои се во лоша состојба

Белата маица е одлично парче облека, но не и оние маици кои се износени и во лоша состојба. Дури и ако ви се омилени, мора да се помирите со фактот дека никогаш повеќе нема да бидат нови, што ја оневозможува нивната повторна употреба. Белата маица треба да биде снежно бела, инаку (често) изгледа нечисто.

3. Неудобни чевли со висока потпетица

Погледнете во вашиот чевларник. Веројатно имате чевли кои се навистина убави, но за жал не можете да одите со нив. Доколку веќе сте ги носеле и се покажало дека потпетицата е многу повисока од што сте мислеле при пробувањето во продавница, или, пак, имате болки во нозете – збогувајте се од овие чевли. Направете место за нови, подеднакво убави, но многу поудобни чевли.

4. Фармерки кои не одговараат на вашата фигура

Фармерките го менуваат својот облик со тек на времето, па сосема нормално е по извесен период да не му прилегаат на вашето тело. Одвреме-навреме, прегледајте ги и испробајте ги сите фармерки, а потоа исфрлете ги сите оние кои не ги носите или не ви одговараат повеќе. И овој потег ќе ви биде од корист наутро, особено ако мора набрзина да одберете што ќе носите тој ден. Додека ги испробувате сите модели од орманот, веројатно ќе сфатите дека 80% од нив не се погодни за употреба.

М. А. | Црнобело