Жена од САД спасила и се грижи за над 200 животни (фото)

Адри Рачел од САД има 33 години и моментално се грижи за над 200 животни, како мачки, кучиња, крави, свињи, па дури и алпаки. Таа ги покрива трошоците од нејзиниот џеб, а добива помош и од донации, но не сака да го отвори засолништето за јавност бидејќи смета дека тоа е стресно за животните.

Адри отсекогаш им помагала на животните што ги наоѓала на улица, а кога сфатила дека тоа веќе не е само хоби и дека има полни раце работа, решила да ја основа непрофитната организација Wild Things Sanctuary, а нејзиниот дом го претворила во засолниште.

„Ми се чини дека патот секогаш ми се вкрстува со животно на коешто му треба помош. А, кога знам дека можам да му дадам безбедно место за живеење, сфаќам дека тоа е мојата животна цел“, вели Адри за нејзината пасија.

Адри навистина има полни раце работа бидејќи таа е одговорна за околу 200 животни. Секој ден од неделата ѝ поминува во грижа за животините, речиси и да нема слободно време, но младата жени вели дека ужива во секоја секунда од тоа.

Иако можеби изгледа необично да се чуваат многу разни животни на едно место, Адри вели дека тоа може да биде од голема помош.

„На пример, кога ќе донесам ново куче дома, тоа можеби ќе се плаши од мене. Но, кога ќе види дека кај мене има многу животни, вклучувајќи и кучиња, кои се среќни, полесно ќе се адаптира“.

Адри живее на фарма во Џорџија, САД, и овде се грижи за сите нејзини животни. Таа вели дека не сака да им ги задоволи само основните потреби, туку сака да ги „разгали“ и да им даде можност вистински да уживаат во животот, отколку само да преживуваат.

„Ова е мојот рај на Земјата, но факт е дека имам многу работа. Имам многу обврски бидејќи повеќето животни се обично постари, болни или биле запоставени од претходните сопственици“.

Истовремено, грижата за толку многу животни не е воопшто евтина и Адри најчесто ги покрива трошоците од нејзиниот џеб, а некогаш добива и донации. Таа вели дека само минатата година потрошила околу 50.000 долари за опрема за засолништето, месечно троши околу 1.000 долари за храна, а годишно дава и по 10.000 долари за ветеринар.

Адри може да го отвори засолништето за јавноста и така да заработува, но одбива да го прави ова бидејќи е стресно за животните.

„Губам голем извор на пари, но убедена сум дека секојдневните посети од странци можат да бидат многу стресни за животни кои закрепнуваат или кои се стари“.

Наместо тоа, таа споделува фотки и видеа на социјалните мрежи од засолништето и животните, а оние кои сакаат можат да донираат пари за да ѝ помогнат. А, од овие објави, и самите ќе воочите дека оваа млада жена навистина го работи ова со многу љубов.

Адри толку многу сака да им помага на животните, што еднаш си го продала автомобилот за да може да откупи стадо крави кои инаку требало да завршат во кланица.

Повеќе фотки од Адри и нејзините животни на следната страница...