Приказната за кучето Луи: Од тепање по улиците низ Велес – до топол дом во Англија (фото)

Невозможно е да ве остават рамнодушни приказните за спасените кучиња, кои од скитници оставени на немилост низ улиците на нашата земја, доаѓаат до топол дом во среќно семејство.

Токму таква е приказната за Луи, кој од бездомно куче, со „страшен“ и слаб изглед заради тешката состојба, кое живеело низ улиците на село Оризари и било малтретирано од жителите, се претвори во неодолив „ѕвер“ кој сега има топол дом во Англија, благодарение на здружение за заштита на животните од Велес.

Станува збор за огромна трансформација која инспирира и влева надеж дека секое животно може да биде спасено, ако се најдат вистинските луѓе кои ќе помогнат.

Кога Луи бил спасен од тимот на Здружението за заштита на животните „Гласот на животните“ од Велес, никој не верувал дека ќе преживее и дека некогаш ќе има можност да почувствува вистински дом и љубов. 

Но, ова храбро и упорно куче се спротивставило на сите мислења и брзо закрепнало, откако било згрижено и го добило она што претходно му било неопходно - топол дом, љубов и нега.

Моника Петковска, од здружението за заштита на животните „Гласот на животните“ од Велес, ни ја раскажа приказната која ја опишува судбината за Луи и неговата трансформација. 

Во продолжение следи целосната приказна и фотографии, кои ни ги испратија од здружението:

„Кога се навикнавме на болката и страдањето, до толку, да престанеме да ги забележуваме? Кога се помиривме со очајот, за да се помириме со него? Колку денови и месеци никој не го забележа? Дали го гледате сега?

Сега кога не е куче на улица, туку фотографија! Дали би нè сфатиле и помогнале некогаш?

ЛУИ - приказна за најголемата трансформација! „Плашило“ од кое луѓето во селото бегаа, и го напаѓаа со камења.

Научени сме на омраза, жалење и сожалување. Црвената и сува кожа на Луи беше резултат на тешката состојба од демодекс, којашто често се забележува кај кучиња скитници. 

Луи беше премногу напатено куче, како и сите останати напуштени миленици! Секое животно си има свој карактер и своја историја на животот, за која дознаваме и откриваме по самото животно. 

„Костурот наш“ прерасна во прекрасен џин! Кога неговата состојба се подобри, почнавме да му бараме дом. Јасно ни беше дека тој дом во Македонија е научна фантастика, дека луѓето тука сакаат само расни кучиња, за кои би платиле неколку стотици евра…

Ја контактиравме Елизабет Бел од Англија, која им помага на стари животни, животни кои не можат да најдат дом, а таа е сопственик на „Penny Jones Animal Hospice“. Таа веднаш се согласи да го вдоми привремено и да се обиде да му пронајде вистинско семејство на Луи.

Не помина ни еден месец, и тој почна да го живее неговиот втор живот! Тој сега живее со прекрасна фамилија, и со уште едно слепо куче. Наша активистка во јануари оваа година доби туристичка виза и замина за Англија да посети дел од животните кои ние ги имаме вдомено таму, од каде се врати полна со импресии. 

Горди сме што го правиме ова! Не секој може да ја почувствува таа радост и горделивост, кога ќе спасиме некое животно. Луѓето често ни велат дека сме херои, па изгледа имаме некоја супер моќ?“

Вашата донација е ценета и добредојдена. Денар по денар можат да спасат живот.

➡️ СМЕТКА ЗА ДОНАЦИИ:

Здружение за заштита на животните ГЛАСОТ НА ЖИВОТНИТЕ Велес

ДЕНАРСКА СМЕТКА: 300270000101436

ДЕПОНЕНТ: КОМЕРЦИЈАЛНА Банка АД Скопје

Донирате по своја желба!!!

PayPal: Оваа е-адреса е заштитена од спамботови. Треба да ви е овозможено JavaScript за да ја видите.

М. М. | Црнобело