Маж со ретко нарушување бил оставен од родителите поради деформираното лице – денес им помага на другите како него

Џоно (37) има ретко генетско нарушување поради што лицето му е деформирано. Откако родителите го напуштиле, тој бил згрижен од жена која го посвоила и по многу премрежја, денес го прифаќа својот уникатен изглед и им помага на другите со истиот синдром да си ја вратат самодовербата.

Џоно Ланкастер од Англија е роден со ретко генетско нарушување, познато како Treacher Collins Syndrome.

Нарушувањето предизвикува видливи деформитети на главата и лицето, а симптомите на Џоно се неразвиена вилица, мали уши, вдлабнати јаболкници и неправилна форма на очите.

Нарушувањето се јавува кај едно од 50.000 лица и, за жал, не постои лек.

Сепак, ако лицето нема сериозни проблеми со дишењето и јадењето кои можат да бидат последица од нарушувањето, можно е да се направат реконструктивни операции на лицето и вилицата.

Но, наместо да се обидат да му помогнат, родителите на Џоно биле згрозени од неговиот изглед и буквално го оставиле.

Откако се родил, и мајка му и татко му не сакале да го видат цели 36 часа, а не дозволувале да биде виден ни од другите членови на семејството.

Набрзо потоа, го оставиле.

Џоно тешко ја преболел оваа траума, а огромна помош му била жената којашто го посвоила – Џин.

На Џин воопшто не ѝ било грижа како изгледа Џоно и без двоумење го згрижила кога имал само две недели.

Кога наполнил пет години, таа и официјално го посвоила.

„Мама секогаш ми вели дека од првиот миг кога ме видела, не можела да се воздржи, а да не се насмевне од среќа“, вели Џоно.

Па, и покрај тоа што бил напуштен од биолошките родители, Џоно никогаш не се почувствувал осамено благодарение на Џин.

Сепак, Џин била особено внимателна кога зборувала со Џоно за неговите вистински родители. Наместо директно да му каже дека го оставиле, со текот на времето му откривала само мали делови од приказната.

„Кога пораснав и подобро ги разбирав работите, ми кажа дека им било тешко да прифатат дека сум различен“.

И покрај љубовта од мајка му, на Џоно му било тешко да го прифати својот изглед.

На училиште се соочувал со предрасуди и луѓето постојано зјапале во него.

Истовремено, презирот на Џоно кон биолошките родители постојано се зголемувал.

Во 2009 година решил да им испрати писмо, но, за жал, добил одговор дека тие не сакаат никаков контакт со него. По ова, неговата омраза само се зголемила.

Со текот на времето Џоно сфатил дека дури и ако никогаш не успее да им прости, сепак им е благодарен на родителите.

„Тие ме донесоа на овој свет. Треба да го живеам животот што ми го подарија. И покрај сè што ми се случи, сега сум на добро место, полн со радост и среќа“, вели тој.

Денес Џоно го прифаќа својот уникатен изглед и е на мисија да им помогне на други лица со истиот синдром да си ја вратат самодовербата.

Тој има и Инстаграм профил со над 230.000 следбеници.

Спирова С. | Црнобело