Волкот и трите прасиња, Црвенкапа: Пет популарни бајки и поуката што ја научивме од нив

Иако можеби како возрасни не им придаваме големо значење, бајките се одличен начин да научиме некои од најважните животни лекции.

Токму поради ова, тие се можеби најпопуларната литература за мали деца.

Сите ги знаеме приказните за Црвенкапа или Јовче и дрвото грав, но сте размислиле ли која е поуката што сакаат да ни ја пренесат?

Волкот и трите прасиња

Во оваа басна, три прасиња си градат куќи – едното прави куќа од слама, другото од дрво, а третото од тули.

Првите две прасиња сакаат да завршат што е можно побрзо, па затоа и користат „полесни“ материјали. Но, волкот успева да им ги сруши куќите, па двете прасиња одат да се кријат во цврстата куќа на третото.

Поука: Ако двете прасиња одвоиле повеќе време и труд, нивните куќи немало да бидат срамнети со земја. Оваа приказна ни покажува дека некогаш треба да вложиме многу повеќе труд и време ако сакаме да постигнеме добар резултат.

Црвенкапа

Малото девојче Црвенкапа тргнува кон куќата на баба ѝ која се наоѓа во шумата. Пред да излезе од дома, мајка ѝ ја предупредува да не зборува со странци.

Но, штом ќе го сретне волкот во шумата, Црвенкапа му кажува сè. Кога стигнува до куќата на бабата, волкот веќе ја изел и сега е преправен во неа, чекајќи да ја изеде и Црвенкапа.

Поука: Овде најважен е советот на мајката на Црвенкапа – не зборувајте со странци. Односно, не можете да ја знаете намерата на непознатите луѓе, па внимавајте што ќе споделите со нив.

Јовче и дрвото грав

Сиромашниот Јовче ја менува неговата крава за волшебни гравчиња, но штом ќе стигне дома, мајка му го прекорува и го тера да ги фрли.

Јовче го прави тоа, но следното утро сфаќа дека од гравчињата пораснало цело дрво кое се издига до небото. Јовче се качува по дрвото и открива дом на џин полн со секакви богатства.

Најпрво тој краде златни парички и се враќа дома, но потоа се качува уште неколкупати за да украде уште од богатството на џинот. Во еден миг, џинот го забележува, па Јовче брзо слегува по дрвото и го сече, со тоа убивајќи го џинот.

Поука: Иако Јовче веќе имал доволно пари за удобен живот, неговата алчност го натерала да се врати во домот на џинот, па дури и да си го ризикува животот. На крај тој и го убива џинот кој само сакал да го заштити она што е негово. Што значи, не треба да ѝ дозволиме на алчноста да управува со нашите постапки, но и да научиме да бидеме задоволни со она што го имаме.

Грдото пајче

Како што кажува насловот, грдото пајче е токму такво – грдо. Поради ова сите други пајчиња му се потсмеваат.

Но, на крај дознаваме дека грдото пајче е всушност лебед, па дури и оние кои најмногу го осудувале, го гледаат со восхит.

Поука: Никогаш не треба да ги оценуваме и осудуваме другите според нивниот изглед.

Принцезата и зрно грашок

Еден принц сакал да си ја најде совршената принцеза за жена, кога една ноќ во неговиот замок дошла извалкана девојка која тврдела дека имa кралско потекло.

Сакајќи да се увери во тоа, мајката на принцот ја оставила девојката да спие на дузина душеци, а под најдолниот ставила зрно грашок.

Следното утро кога ја прашала дали спиела добро, девојката ѝ кажала дека нешто ја бодело во грбот – зрното грашок – и ѝ направило модринка, а со тоа докажала дека е принцеза.

Поука: Слично како со грдото пајче, и оваа приказна нè учи да не им судиме на другите според изгледот. Кога стигнала во замокот, девојката била неуредна и не изгледала како принцеза, но тоа не значи дека ја немала оваа титула.

Спирова С. | Црнобело