Денес се закројуваат лозјата: Свети маченик Трифун, заштитник на градинарите и на лозарите

Денес именден празнуваат Трифун, Трајан, Трајанка, Трајко, Трајче… Светиот маченик Трифун е роден околу 225 година во Кампсада, во малоазиската област Фригија, во близината на градот Апамија.

Со Божја помош, Трифун лекувал болни и ги бркал лошите демони. За неговите чуда се раскажувало низ целата империја, а бил повикан во Рим кај царот Гордијан, бидејќи неговата ќерка Гордана се разболела од душевна болест и не можел да ја излекува ниту еден лекар во империјата.

Во еден момент, нечистиот дух од неа проговорил дека никој не може да го избрка освен Трифун. Наскоро, во Рим пристигнало 17-годишното момче од Кампсада, коешто за кусо време ја излекувало царската ќерка и се стекнало со уште поголема слава. Трифун бил даруван со многу дарови од страна на царот кои подоцна на враќање им ги поделил на сиромасите.

Свети Трифун умрел со маченичка смрт на само 21 година, за време на царот Децие, кога бил извршен голем прогон на христијаните. По неговата смрт, за свој покровител го зеле градинарите, лозарите и меанџиите.

Свети Трифун е еден од поголемите празници кои македонскиот народ ги празнува со многу обичаи, главно познат по обредното закројување на лозјата. Како што забележале собирачите на македонските народни умотворби, тој бил покровител на меанџискиот еснаф, но и заштитник на лозарите и градинарите.

Се верувало дека тој ги штити лозјата и градините од разни штети и несреќи (болести, инсекти, градоносни облаци и сл.).

Според новиот календар, денес, на 14 февруари го празнуваме Свети Трифун. Затоа закројте го лозјето доколку го имате и напијте се чашка вино во чест на големиот христијански празник.

(О)Милена | Црнобело