Приказни од вселената: Астронаутите читаат книги за деца од Интернационалната вселенска станица

Проектот Story Time from Space е дело на непрофитната организација Global Space Education Foundation. Како дел од проектот, астронаутите кои се на Интернационалната вселенска станица (ISS), читаат популарни детски книги, и тоа директно од вселената.

Зад оваа идеја стои Патриша Трајб. Наводно, таа истражувала за писменоста и познавањето на науката во САД, па решила да ги спои вселената и читањето.

„Зарем има подобри идоли што ќе ги вклучат децата во наука и ќе ги натераат да читаат? Не само што ги гледате и слушате книгите, туку ја разгледувате и Интернационалната вселенска станица“, изјавила таа.

Идејата прв пат била тестирана со астронаутот Бенџамин Алвид Дру. Тој ја читал книгата Max Goes to the Moon, од астрофизичарот и писател Џефри Бенет.

Тимот на проектот го сочинуваат астронаути, научници, наставници и други личности, а книгите што ќе се читаат се одбираат навистина внимателно.

Важно е книгата да може да се прочита за 15 минути, да биде поучна и најважно од сè, да нема лажни информации.

Тимот добива книги од авторите кои сакаат да бидат земени предвид, а имаат и листа со погодни книги. Штом ќе ја одберат книгата и ќе добијат дозвола за лансирање, книгата се испраќа кај НАСА, каде што се подготвува. На крај, книгата се испраќа во Флорида, за да се лансира.

Покрај читањето, тимот се обидува да започне и правење видеа со детски научни експерименти, изведени на ISS.

Навистина одлична идеја што им покажува на децата дека учењето и читањето можат да бидат забавни.

Спирова С. | Црнобело