Дикенс свирел хармоника, Хемингвеј бил (рибо)ловец: Невообичаени хобија на големите писатели и поети

Зборот „хоби“ потекнува од средновековна Англија, каде овој збор го означувал дрвениот коњ за играње. 

Подоцна, кога зборот „хоби“ го добил самостојно значење, овој збор означувал детски ентузијазам. Денес знаеме дека и возрасните луѓе имаат хобија, како и научниците, уметниците и писателите. Ова се некои од невообичаените хобија на големите светски писатели и поети.

Сликарство е хоби со кое се занимавале многу познати писатели. Некои, како Виктор Иго и Вилијам Блејк, биле подеднакво познати по нивните слики, како и книги, додека другите, како Т.С. Елиот, Вилијам Фокнер, Киплинг и Беатрикс Потер, самите ги илустрирале своите дела.

Луис Керол се сметал за многу трпелив човек, опседнат со најситните детали, па не изненадува што неговото хоби била фотографија.

Многу писатели, исто така, се занимавале и со музика, а некои биле дури и професионалци.

Чaрлс Дикенс редовно свирел на хармоника во локалниот паб, додека сите три сестри Бронте биле успешни пијанисти, а љубовта кон музиката била пренесена и на нивните литературни дела. Нивните романи подоцна често биле поставувани на сцената како мјузикли.

Покрај нив, современиот американски писател, Стивен Кинг, свирел гитара во бенд во младоста, но штом сфатил дека нема да може да заработува од своето хоби, почнал да пишува.

Сепак, малку е познато дека сè уште прави турнеи низ Америка со бројни концерти за добротворни цели.

Многу големи светски писатели подеднакво биле заинтересирани за науката. Марк Твен успеал да биде подеднакво добар како писател и научник. Твен измислил фото-албуми со самолепливи сликички, игри за подобрување на меморијата и, верувале или не, трегери.

Агата Кристи многу често го пратела својот сопруг, кој бил познат археолог, на неговите патувања, затоа и самата била заинтересирана за археологија. Но таа никогаш не сакала да се претстави како научник, бидејќи археологијата била само нејзино хоби.

Беатрикс Потер, англиската писателка, имала многу необично хоби – проучување на габи. Всушност, таа била една од првите што ги препознала симбиотичките односи меѓу алгите и габите, но нејзиниот успех не бил признаен, бидејќи била жена.

Џ.Р.Р. Толкин, исто така, бил еден вид на научник, но во полето на лингвистиката. Уште од детство зборувал на десетина јазици. Неговиот интерес за говорниот систем му помогнал во создавањето на сопствениот јазик (јазикот на елфовите), преку кој се допишувал со неговата сопруга Едит.

Од друга страна, Артур Конан Дојл, креаторот на Шерлок Холмс, тајно се занимавал со истражување на паранормално и натприродно, а бил и еден од првите познати ловци на духови.

Емили Дикинсон била позната готвачка, а освоила и бројни награди за своите кулинарски специјалитети. Најмногу награди земала за својата торта од кокос, за која не сакала да го открие рецептот долго време.

Ернест Хемингвеј бил запаметен како страстен ловец и риболовец. Тој патувал низ целиот свет, а бил награден на Карибите во 1935 година, бидејќи ја фатил најдолгата сабјарка.

Ашера | Црнобело