Торта, вино и салама со потпис Меланија - родното место на првата дама прави профит од нејзината популарност

Меланија торта, Меланија крем. Меланија вино и чај. Меланија папучи, Меланија салама. Во родниот град на првата дама на САД очигледно одлично заработуваат благодарение на нејзиното потекло.

Многу малку производи останале имуни на трендот во руралното место Севница во Словенија каде што Меланија Трамп ја поминала својата младост.

Ограничените авторски права сепак значат дека поголемиот дел од производите само алудираат на нејзиниот идентитет, па така виното има етикета „Прва дама“, а папучите во сребрена боја со голема бела пуфка која потсетува на зајче од опавче се наречени „Белата куќа“.

Госпоѓата Трамп ја стави малата Севница во центарот на вниманието, иако местото брои околу 5000 жители и се протега во шумска долина покрај река, на некои 90 минути со автомобил од главниот град на Словенија, Љубљана.

Единствениот хотел кој се наоѓа во градот е повторно отворен на почетокот на оваа година, а бројот на туристите е зголемен за околу 15% за разлика од минатата година.

Меланија секако има прилично голема улога во прославувањето на Севница. Тортата „Меланија“ е само дел од деликатесите кои алудираат на неа и со кои можете да се засладите доколку го посетите родното место на сопругата на американскиот претседател.

Бројот на туристи постојано се зголемува последните 3 години, откако нејзиниот маж стана претседател на САД.

„По Меланија, работите навистина се променија“, потврдил и градоначалникот на градот Среќко Оцвирк. „Сега имаме туристи од целиот свет“.

Жителите ја фалат Меланија што го ставила ова мало словенечко место на светската мапа.

Сепак, многумина се муртат на овие изјави и потврдуваат дека Севница има да покаже и многу повеќе покрај фактот што првата дама на САД потекнува од таму.

(О)Милена | Црнобело