Не заборавајте секој ден да се заблагодарите барем за 3 убави работи

Не постои сомнеж дека длабоко во човековата природа ни е вкоренето да се фокусираме првенствено на негативните работи. Но, дали сте знаеле дека човечкиот мозок ги процесира позитивните и негативните информации во различни хемисфери?

Негативните емоции нé тераат да размислуваме повеќе, а тоа води до еден вид на опсесивно однесување. Ова воедно објаснува зошто критиките и негативниот фидбек имаат подолготрајно влијание врз нас, отколку кога ќе се случи нешто добро.

Лесно е да се биде среќен кога животот е добар. Нашето ментално здравје е ставено на тест кога работите тргнуваат надолу, наопаку.

Но, со текот на годините учите многу работи, а ова е една интересна вежба која е многу ефикасна во борбата против негативното размислување, а се однесува на – благодарноста.

Не заборавајте на добрите работи во животот

Запрашајте се секогаш кога ќе почувствувате дека ви е многу тешко – за што сте благодарни во животот? Поставувајте си го ова прашање секој ден. Дури и да станува збор за нешто ситно или банално, како шолја добро кафе, сепак тоа ви носи насмевка и треба да се цени.

Благодарноста е вежба која треба да ја практикуваме секојдневно.

Благодарноста значи да го рефокусираме вниманието на она што го имаме, наместо кон она што ни недостасува. Кога ќе ги препознаеме сите добри работи во нашиот живот – здравје, семејство, љубов, мир, хармонија, покрив над главата, работа, патувања, дружба со пријателите, итн., тогаш чувствуваме и искажуваме благодарност, а тоа нé прави помирни, поприбрани, поздрави.

Бројни студии ја покажуваат силната поврзаност помеѓу благодарноста и менталното здравје.

Од една страна се намалува анксиозноста и депресијата, а од друга – чувствата на оптимизам, среќа, задоволство, ентузијазам и многу други позитивни емоции се зголемуваат.

Доколку вежбате искажување благодарност првенствено кон себе, вие непрестајно „вртите“ позититен круг во вашиот мозок. Колку повеќе го гледате доброто во вашиот живот, толку повеќе сте посреќни и имате поголеми шанси за успех.

За крај, обидете се да живеете во моментот. Нема многу поента во вртење кон минатото и живеење со носталгија или пак со поглед свртен премногу кон иднината.

Вие сте СЕГА и ТУКА, останете фокусирани на ДЕНЕС и направете место за нови позитивни чувства и мисли и НОВ ЖИВОТ.

И не заборавајте секој ден да се заблагодарите барем за 3 убави работи.

(О)Милена | Црнобело