Популарните играчки тролови од '90-тите: Како изгледаат денес?
Оние кои растеле во 90-тите, сигурно се сеќаваат на овие многу популарни мали трол куклички со коса во неонски бои.
За многумина поимот „трол“(troll), сè уште асоцира и е резервиран единствено за пластичните играчки од детството, во форма на чудни суштества со препознатливи диви косички, карактеристични збрчкани и насмеани лица, големи уши и циркончиња на телата.
Познати се уште и како тролови за среќа, а исто така беа и препознатливи ликови од компјутерски игри.
Интересно за овие мали кукли е дека повторно се враќаат во мода на секои една до две децении.
Создадени се уште на крајот од 50-тите години на минатиот век во Данска и првите примероци биле направени од дрво, од страна на данскиот рибар Томас Дам, кој имал талент за резбање на мали фигури.
Подоцна со нивната популаризација и со отварањето на фабрика за трол играчки, почнале да се произведуваат од пластика, во различни варијанти и големини. Овие кукли многу брзо го освоиле светот и постигнале огромна продажба и популарност насекаде.
Уште во далечните 60-ти години, децата собирале колекции од овие играчки, а најголемата колекционерка Шери Грум од САД, брои речиси 3.000 уникатни трол фигури во својата колекција и е запишана во „Гинисовата книга на рекорди“.
Во 2005-та година, компанијата на Дам ги презентираше малите суштества во понова верзија, под името Trollz, меѓутоа не постигнаа задоволителен успех на пазарот.
Во поново време повторно се појави трендот на собирање на троловите и сега повторно се враќаат и го освојуваат пазарот на играчки, воедно и како анимирани ликови. Имаат и променет изглед, а франшизата е во сопственост на DreamWorks.
Е. А. | Црнобело